कोरोनां सार्कयात नापं तये हल

येँ- विश्वय् न्यना वंगु कोरोना भाइरसं विश्वया सम्पर्क व स्वापूयात तापाका यंकूसां तापानाच्वंपिं सार्क देय्तय्त धाःसा छथाय् तये हःगु दु ।
कोरोनालिसे ल्वायेत मंकाः कुतः यायेमाःगु आवश्यकता महसुस यासें म्हिगः भारतीय प्रधानमन्त्री नरेन्द्र मोदीं ग्वसाः ग्वयादीगु ‘सार्क राष्ट्रया भिडियोकन्फेरेन्स’य् सार्कया सकलें सरकार प्रमुखतय्सं ब्वति काःगु खः । उकी पाकिस्तानपाखें धाःसा प्रधानमन्त्रीं ब्वति मकासे स्वास्थ्यमन्त्री जक सहभागी जुयादीगु खः ।

उगु भिडियो कन्फेरेन्सय् भारतीय प्रधानमन्त्री मोदीं कोरोनालिसे ल्वायेगु लागिं तुरुन्त हे ‘कोविद इमर्जेन्सी फन्ड’ दयेकेगु प्रस्ताव तसें उकी भारतं १ करोड डलर दां तयेगु प्रस्ताव तयादीगु खः । लिसें वय्कलं कोरोनां ताःई हे प्रभाव लाकीगु जूगुलिं थ्व क्षेत्रया आर्थिक गतिविधियात गय् यानाः न्ह्याका तयेगु धइगु बारे दूरगामी नीति दयेकेगु लागिं विज्ञतय्त ज्या याके बीमाःगु प्रस्ताव तयादीगु खः ।

पाकिस्तानया स्वास्थ्यमन्त्री जाफर हुस्सेनं थ्व इलय् सार्क सचिवालययात सक्रिय यायेमाःगु प्रस्ताव तसें भारतया जम्मू व काश्मिरय् तयातःगु प्रतिबन्ध चीकाः अन नं कोरोना विरुद्ध ल्वायेत सामाग्री छ्वयेमाःगु प्रस्ताव तयादिल । लिसें वय्कलं कोरोनालिसे ल्वायेगु लागिं चीनपाखें शिक्षा कायेमाःगु बिचाः नं तयादिल ।

बंगलादेशया प्रधानमन्त्री शेख हसिना वाजेदं आः तुरुन्त हे सार्क स्वास्थ्यमन्त्रीतय्गु सम्मेलन सःतेमाःगु प्रस्ताव तयादिल ।
भूटानया प्रधानमन्त्रीं थःगु देशय् छम्ह विदेशीयाके कोरोना पोजिटिभ खने दयेवं वयागु उपचारया ज्याय् भूटानया जुजु तकं चछि अस्पतालय् हे वयाः सक्रिय जूगु प्रशंग कँसें कोरोनालिसे ल्वायेत थःपिंसं यानाच्वनागु ज्याखँ बारे जानकारी बियादिल ।

अफगानिस्तान, माल्दिभ्स व श्रीलंकाया राष्ट्रप्रमुखतय्सं मोदीं तःगु प्रस्तावयात स्वीकार यासें उकी थःपिं नं सहभागी जुइगु बचं बियादिल । अथे खःसां भारतं १ करोड डलर तये धकाः घोषणा याःगु फन्डय् थःपिंसं गुलि ध्यबा तयेगु धइगु बचं धाःसा छुं नं देशय् अन मबिउ ।
अन्तय् भारतीय प्रम मोदीं भिडियो कन्फरेन्स उपलब्धीमूलक जूगु धासें सकसितं सुभाय् बियादिल ।