संघीयताया औचित्य विषयय् प्रशिक्षण

ख्वप (नेपालभाषा टाइम्स) – संघीयताया आवश्यकता, औचित्य व आधार विषयय् विज्ञ प्रशिक्षण ज्याझ्वः जूगु दु । थनया रोम्बस स्कुलय् शिक्षक, शिक्षिका नापं पत्रकारतय्त निंतिं उगु प्रशिक्षण ज्याझ्वः जूगु खः ।

संघीयताया विषयय् विद्यावारिधी यानादीम्ह विज्ञ डा. राजेन्द्र कोजुं बियादीगु छवाःया प्रशक्षणय् संघीयताया थीथी मोडलया बारे कनादीगु खः ।
वय्कलं नेपाःया संघीयता थौंया वास्तविकता स्वयां पानाच्वंगुलिं उकी आमूल परिवर्तनया आवश्यक जू धयादिल ।

संघीयता धइगु संघ, प्रदेश व स्थानीय तह कायम यायेगु जक मखसे लिउने लानाच्वंगु वर्ग, जाति, लिंग, समुदाय, स्थानयात नं उचित व सम्मान जनक राजनीतिक पहुँच दयेकेगु, समान हैसियत कायम जुइगु वातावरण दयेका वनेगु हे थुकिया मुख्य मर्म जूगु वय्कलं धयादिल । नेपालय् आःतक नं एकात्मक राज्य प्रणालीया प्रभाव दयाच्वंगुलिं गणतन्त्र वःसां संघीयतां बांलाक ज्या यायेमफुगु खँ कनादिल ।

प्रशिक्षण सहभागितय्सं तःगु न्ह्यसः व जिज्ञासाया लिसः बियादिसें डा. कोजुं शक्ति आर्जन यायेत राजनीतिइ वइगु कारणं राजतन्त्र, प्रजातन्त्र , संघीयता व संसदीय प्रणालीयात राजनीतिक अभ्यास यायेगु थाय्कथं नालेमाः धयादिल ।

सकतांकथंया निर्णय यायेगु आत्मनिर्णय सहितया अधिकारं समस्या नं वयेफु धासें तराई मधेशय् जूगु आन्दोलनपाखें वःगु उकथंया मागं खतराया संकेतकथं थुइमाःगु खँय् नं वय्कलं ध्वाथुइकादीगु खः ।