आकाझाकां ब्रेक ज्वंबलय् चुलुया दुर्घटना, विमानयात रनवें पित हल

येँ– म्हिगः बहनी दुर्घटना जूगु मालिन्दो एयरया विमानयात रनवें लिकाःगु दु । आः १२ बजे पाखे निसें विमानस्थल सुचारु जुइगु खँ धाःगु दु ।
मालिन्दो एयरया विमान ब्वयेगु निंतिं रनवेलय् ब्वाँय् वनाच्वंगु इलय् चुलुया रनवे नं ४० मिटर पिने घाँय्या मैदानय् दुहांवंगु खः । विमान पाइलटं आकाझाकां ब्रेक ज्वनेमाःगुलिं विमान स्लिप नयाः रनवें नं पिहां वंगु खँ धाःगु दु ।

विमानस्थलया प्रमुख रामकुमार क्षेत्रीं पाइलटं आकाझाकां ब्रेक ज्वनाबलय् चुलुयाः रनवें नं पिहां वंगु प्रारम्भिक जानकारी बिउगु कनादीगु दु । पाइलटं जानकारी बिउकथं विमान ब्वये हे त्यंगु इलय् न्ह्यःनेया स्क्रिनय् समस्या खनेदयेवं पाइलटं आकाझाकां ब्रेक ज्वंगु खः ।

विमानयात थौं सुथं निसें रनवें नं चिइकेगु कुतः याःगु खः । नया खिपः हयाः क्रेनया, पुसब्याक गाडीया ग्वाहालिं विमानयात रनवें नं चिइकूगु खः । विमानस्थलय् विमानयात सालेगु नया खिपः मदुगुलिं म्हिगः बहनी हे विमान चीकेमफुगु खः । थौं सेनायाके दुगु नया खिपः हयाः ७० म्ह सेना, ३० म्ह प्रहरी, ३० म्ह विमानस्थल कर्मचारीतय् ग्वाहालिं विमानयात रनवे नं चिइकूगु खः ।