भारतयात नेपाःया प्रोटेस्ट नोट

येँ (नेपालभाषा टाइम्स) – भारतीय सञ्चार माध्यमय् नेपाः व नेपाली नेतृत्वया बारे मखुमखुगु समाचार प्रसारण याःगु धासें नेपालं भारतयात ‘प्रोटेस्ट नोट’ छ्वःगु दु ।

परराष्ट्र मन्त्रालयं दिल्लीस्थित नेपाःया राजदूतावास मार्फत छ्वःगु् ध्यानाकर्षण पत्रय् नेपाः बारे प्रसारण जूगु अश्लील सामग्रीयात कयाः माःगु पलाः ल्ह्वनेत इनाप यानातःगु दु। परराष्ट्र मन्त्रालयया कथं वंगु छुं न्हिं न्ह्यः हे भारतीय परराष्ट्र मन्त्रालययात उगु नोट छ्वःगु खः ।

लिपांगु इलय् नेपाः व भारत दथुइ नक्सा प्रकरणयात कयाः समस्या तच्वया वनेवं भारतीय सञ्चार माध्यमं नेपाः विरुद्ध आपत्तिजनक सामग्री प्रसारण याना वयाच्वंगु दु। नेपालं छ्वःगु नोटय् भारतीय सञ्चार माध्यमं आधारहीन, गलत व असंवेदनशील सामग्री प्रसारण याःगुलिं उकिं नेपाःमि जनता व नेपाली नेतृत्वया भावनाय् चोट लाःगु खँ न्ह्यथनातःगु दु ।