खिचां मसिउगु दुःख सी !
निदँ दत । देशय् शानदार बहुमत प्राप्त कम्युनिष्ट सरकार वःगु । आम जनतां विश्वास याइ । आः देशय् राजनीतिक स्थायीत्व वइ । स्थिरता खनेदइ । जनता धुक्क जुइ । आः सरकारं दृढतापूर्वक ज्या न्ह्याकी । आम जनताया हित कल्याणया ज्याझ्वःत वइ । बी । हइ । कम्युनिष्ट सरकार । थ्वया सैद्धान्तिक पृष्ठभूमि, आधारं हे जनताया पक्षय् विश्वास थनी ।
सरकारं आः गरिब, शोषित, पीडित जनताया पक्षय् ज्या याइ । क्रान्तिकारी पलाः छी । राजनीतिक अस्थिरतां ढलमल जुयाच्वंगु अवस्था । अन्त्य जुइ । आम जनतां सुख सी । जनताया मनोबल थहां वइ । तर । अफसोच ! सैद्धान्तिक पृष्ठभूमिया आधारय् गुगु आशा, विश्वास विद्यमान कम्युनिष्ट सरकारपाखें जनतां काःगु खः ।
किन्चित मात्राय् नं पूवंगु अनुभूति थौं जनतां याये मफुत । गरिबी, शोषण, उ्रत्पीडनया विषय केवल चुनाव त्याकेत छलछाम हल्लाकथं जक छ्यलेगु ज्या सच्चा कम्युनिष्टतय्सं याइमखु । थज्याःगु हर्कतं यथार्थय् सैद्धान्तिक शोषण जुइ । कम्युनिष्ट सिद्धान्तं समाज रुपान्तरणया खँ ल्हाइ । गरिबी, शोषण, उत्पीडनया अन्धकारं जबतक आम जनतायात समानता न्यायया जः दुथाय् थ्यंकेगु संघर्ष न्ह्याकीमखु व कम्युनिष्ट सरकार जुइ फइमखु ।
सच्चा अर्थय् । गुगुं नं कम्युनिष्ट सरकारया सफलता वं गरिबी, शोषणया नामय् हल्ला गुलि यात, याये फत उकिया आधारय् क्वःछी फइमखु । क्वःछी नं मजिउ । यथार्थय् वं समाजयात सही धंगं हिइकेत छु छु न्यायोचित, विश्वसनीय पलाः छित उकिया आधारय् मूल्यांकन जुइ । जुइमाः ।
असाधारण बहुमत प्राप्त विद्यमान कम्युनिष्ट सरकारं निदँया दुने समाज रुपान्तरणया निंतिं छु छु यात ? लेखाजोखा याये । मूल्यांकन यायेत स्वये ! लिच्वः । उत्साहवद्र्धक जुइमखु । अःबखतं नुगः क्वतुनी । आः देय् गन वनी, गन थ्यनी ? छु छु जक स्वये मालीगु खः । निराशां ग्रस्त जुइ । छम्ह तःधंम्ह कम्युनिष्ट नेतां धाइ, ‘झी कम्युनिष्टतय्के सैद्धान्तिक आदर्श स्खलन जुयाः वनाच्वंगु दु ।
कमजोर जुया वनाच्वंगु दु ।’ थज्याःगु खँ न्यने । नेताजुया धापू न्यने । ‘थः हे बोक्सी, थः हे धामी’ धाःगु उक्ति लुमनी । थौं देशय् कम्युनिष्ट सरकार धाइ । तर सरकारया ज्याय् जनपक्षीय लक्षण छु दु ? खंकेत जनतां गुलि वाटया चीम च्याकाः स्वयेमाःगु खः । जनतां मसिउ ।
एकमना सरकार । छगू हे दलया सरकार जूगुलिं आः निश्चित ज्याझ्वः, योजना ज्वनाः न्ह्याःवनी ।
आः अन्तर दलीय ल्वापुख्यापुइ देय् फसे जुइमखुत । देय् पूर्णरुपय् विकासया लँपुइ न्ह्याःवनी । देशं समृद्धि प्राप्त याइ । विश्वय् हे थौं नमूना जुया लुयाच्वंगु कम्युनिष्ट सरकारपाखें जनतां तःधंगु अपेक्षा याःगु खः । तर थौं सरकारं पिनें समृद्धिइ तःधंगु आकर्षण क्यंसां थःगु दल दुनें हे आन्तरिक सन्तुलन काये मफुनि । दल दुनेया हे कलहं ग्रस्त तिनि ।
गुलिसिनं धाइ, ‘निगू दल दथुइ जूगु स्वापू थौं ‘सेक्स एलर्जीं’ ग्रस्त निम्हतिपूया स्वापू थें जुयाच्वंगु दु ।’ इमिगु सहवास सुखद खने दइमखु ।
अझ । नेकपाया पार्टीपंक्ति दुने थौंकन्हय् खने दयाच्वंगु हानथापं जनताया दथुइ पार्टी दुने सलबलय् जुया वयाच्वंगु आन्तरिक कोटपर्वया शंका थना बिउगु दु । देशय् राजनीतिक स्थायीत्व वइ धइगु गुगु विश्वास लूगु खः व दिवास्वप्न जक खः ।
जनतां थौं आशा त्वःता हयाच्वंगु दु । नेकपा दुनेया नेतृत्वया शक्ति संघर्ष राणा शासनकालय् प्रधानमन्त्री पदया निंतिं जुइगु काटमार, द्वन्द्वया स्मरण याकी । देय्या विकास, समृद्धि धइगु हे कथित नेतातय् दथुइ जुइगु अहंकारया युद्ध खः धकाः मन तयाच्वने माःगु बाध्यता दु ।
तर । थौं देशय् तःधंगु चुनौति वयाच्वंगु दु ।
विश्वव्यापी रुपय् न्यना वयाच्वंगु कारोना भाइरसं संसार हे त्रसित जुयाच्वंगु दु । प्रत्येक देशं सम्भावित खतरायात चिउताः तयाः माःगु प्रतिरक्षाया पलाः छी धुंकूगु दु । तर थन सरकारया ध्यान सु प्रधानमन्त्री जुइगु धइगु षडयन्त्रया खेलय् केन्द्रीत जुयाच्वंगु दु । कोरोना भाइरसं थिल कि देय् व जनतां खिचां मसिउगु दुःख सी । थ्व खँय् सरकारं इलय हे होस यायेमाः ला कि म्वाः ? लिसः बीम्ह सु ?
LEAVE YOUR COMMENTS