नेवाः व दलिततय्गु स्वापूया भविष्य

रुपा सुनार व सरस्वती प्रधान काण्ड धइगु बालं व थीत्यः मत्यःया नाप स्वानाच्वंगु विषय खः । थुगु विषययात कयाः दकलय् अप्वः चर्चा सामाजिक सञ्जालय् जुल । कोरोना महामारी जुयाः निषेधाज्ञा लागू जुयाच्वंगु इलय् सामाजिक सञ्जाल यक्वसिनं अधिकतम छ्यलाच्वनीगु ई जुयाः हे जुइमाः सायद् थ्व घटना नं दकलय् अप्वः सामाजिक सञ्जालय् हे चर्चा जुल । धाये जिउ नं धाल, मजिउगु नं धाल, न्ह्यःने लाःथे च्वयेगु नापं द्वपं बिइगु ज्या नं जुल । गबले थुगु काण्ड तसकं चर्चा जुयाः छगू कथं तनावया वातावरण ब्वलनाच्वंगु खः अबले सिइदतत कि रुपा सुनार धइम्ह छगू कम्युनिष्ट पार्टीया कार्यकर्ता खः । लजगाःया ल्याखं संचारकःमि जूसां नं कम्युनिष्ट पार्टीया कार्यकर्ता जूगुलिं वय्कःया पक्षय् पिथंगु विज्ञप्तिइ तकं कमरेड धकाः सम्वोधन यानातःगु खनेदु ।

संवादया कुतः
थुगु घटनां नेवाः व दलितया दथुइ बांमलाःगु लिच्वः लाकीगु संभावना खने दयावयेवं यक्वसिनं चिउताः प्वंकेगु ज्या जुल । थवंथवय् सहलह ब्याकेगु ज्या जुल । थ्व हे दथुइ रुपा सुनार व सरस्वती प्रधानया दथुइ वार्ताया माध्यमं दलित व नेवाः निगुलिं पक्ष मबुइगु कथं सम्झौता यायेगु कुतः यानागु खः ।

अबले आहुतिया नेतृत्वया पार्टी बैज्ञानिक समाजवादी कम्युनिष्ट पार्टी नेपालया भातृ संगठन जात व्यवस्था उल्मुलन मोर्चा नेपालया बागमती गण्डकी सम्पर्क समितिया संयोजक रुपा सुनार खः, अले उगु मोर्चां रुपायात कमरेड धकाः विज्ञप्ति पिकाःगुलिं ला झन हे प्रस्ष्ट जूगु खः । उकिं आः वार्ताया नितिं कुतः धइगु सुनारया नेता आहुतिलिसे हे सहलह ब्याकाः यायेमाली धकाः छगू कथंया खँ जुल अले उकिया नितिं कुतः यायेत नेवाःतय्गु राष्ट्रिय संगठन नेवाः देय् दबूया नायः नरेश ताम्रकारयात यानागु खः । अले देय् दबूया नायः ताम्राकारं आहुतियात स्वापू तयादिल । आहुतिं जात व्यवस्था उल्मूलन मोर्चा नेपालका कजि राजकुमार हिङमाङयात स्वापू तयेत स्वापू नम्बर नं बियादीगु खः तर फोन न्ह्याक्व याःसां राजकुमारया फोन ल्ह्वनेगु ज्या मजुल धकाः खबर वल । थुकिं छु स्पष्ट जुल धाःसा वय्कःपिं दलिय रुपं योजना कथं हे थ्व काण्ड यायेत न्ह्यचिउगु खः । संगठित कथं हे जूगु खने दत । अय्नं अन्तिम इलय् तक नं उकिया निंतिं कुतः यायेगु ज्या मजूगु मखु ।

रुपा सुनार छम्ह संचारकःमि नं जूगु ल्याखं दलिततय्गु पत्रकार संगठन व नेवाः पत्रकार संगठनया दथुइ स्वापू तयेगु अले संवादया लकस ब्वलंकेगु कुतः सुरुनिसें हे यानागु नं खः । उकिया नितिं नेवाः पत्रकार राष्ट्रिय दबूया नायः सुरजवीर बज्राचार्य व महासचिव सुनिल महर्जनं कुतः यानादीगु खः । संवादया निंतिं मुँज्या जुइ थें च्वनीगु अले हाकनं सम्पर्कय् वयेत तयार मजूगु ज्या दलितया पत्रकार पासापिंपाखें हे जुल । थुकिं नं स्पष्ट जुल कि दलितत उगु इलय् वार्ताय् वयेत तयार हे मदु बरु थ्व मुद्दायात अझ न्ह्यःने यंकेगु निंतिं संगठित रुपं हे न्ह्याः वनाच्वंगु खनेदत ।

थ्व निगू कथंया कुतःयात कयाः स्वयेबलय् दलित व नेवाःतय्गु दथुइ स्वापू मस्यनेमा अले निगू पक्षया दथुइ लिपा लिपा नं नापं वने फयेमाः धकाः पहल जूगु तर अबले दलित समुदाय हे वार्ताय् वयेत तयार मदुगु खनेदत । आः खँ वइ छम्ह विचारकया रुपय् न्ह्यःने वयाः बैज्ञानिक समाजवादी कम्यनिष्ट पार्टी नेपालया संयोजक कमरेड आहुतिं नेवाः व दलितया दथुइ वार्ताया नितिं संस्थागत पहल मजू धकाः धयादीगु बारे । वय्कलं सार्वजनिक रुपं बियादीगु थ्व बिचाः पूवंक गलत खः धकाः प्रमाणित जूगु दु । उकिं वय्कलं लिपांगु इलय् वयाः गुगु कथं तर्क तयाः थःगु पार्टी व थःगु पार्टी अन्तर्गतया मोर्चा नापं कार्यकर्तायात बचे यायेगु कथंया कुतः यानादीगु दु थ्व वास्तवय् दलिय स्वार्थय् च्वनाः दलित व नेवाःतय्त भ्रमय् लाकेगु कुतः यानादीगु खः ।

मन्त्रीया भूमिका
रुपा सुनार व सरस्वती प्रधान काण्डयात कयाः गुगु कथं प्रहरी हिरासतपाखें मुक्त जुइगु दिनय् ओली सरकारया बहालवाला मन्त्री हे वनाः सरस्वतीयात लिफ्ट बिइगु ज्या गुगु कथं जुल उकियात कया प्यखेरं आलोचना यायेगु ज्या जुयाच्वंगु दु । सरकारवादी मुद्दा जुयाच्वंगु अवस्थाय् प्रमाण मदुगु आधारय् त्वःतीगु अवस्थाय् स्वयं बहालवाला मन्त्री वनादीगु धइगु राजनीतिक रुपं जस कायेगु नितिं खः धकाः प्रष्ट जू । मन्त्री वनादीगु धइगु मन्त्रीं छगू पक्षयात समर्थन यानादीगु संकेत खः । उकिं अनावश्यक रुपं मन्त्री सहभागी जुयादीगुलिं सरस्वती प्रधान थुनामुक्त जुइ धुंकूगु अवस्थाय् नं थुगु मुद्दायात कयाः सडकय् प्रदर्शन यायेगुनिसें राजनीतिक दलतय्सं तकं विज्ञप्ति पिकायेगु ज्या जुयाच्वंगु दु । छगू कथं थुगु मुद्दा क्वचाये त्यंगु अवस्थाय् हाकनं चर्के यायेगु ज्या जकं जूगु मखुला धकाः न्ह्यसः ब्वलना वःगु दु । दलित सुनारया पक्षय् धकाः थीत्यः मत्यःया विरुद्ध धकाः सक्रिय जुइपिं मनूत व संस्थातय्त मेगु कथंया मसला जुयाबिउगु दु । अथे हे सरस्वती प्रधानयात थुना मुक्त यायेगु ज्या जुइ धुंकाः नं हाकनं हाकनं थुगु मुद्दायात कयाः नेवाःतपाखें नं जातीवादी कथं ल्ह्वनेगु ज्या जुयामच्वंगु मखु । थुकिं यानाः नेवाःत थीत्यः मत्यःया आन्दोलनया विपक्षय् जकं वंगु मखुला धकाः न्ह्यसः थनेत अःपुइगु कथंया गतिविधि छुं छुं पक्षं यानाच्वंगु खनेदु ।

दलित व नेवाःतय्गु सरोकार
दलित धइपिं थीत्यः मत्यःया ल्याखं द्वलंद्वःदँ न्ह्यःनिसें पीडित जुयाच्वंपिं खः । थीत्यः मत्यःयात न्हंका छ्वयेगु आन्दोलनय् नेवाःत नं नापनापं न्हापांनिसें दु । अथे हे नेवाःत धाइपिं सांस्कृतिक, भाषिक नापं भूमिया ल्याखं राज्यपाखें पीडित समुदाय खः । नेवाःतय्गु थुगु मुक्तिया आन्दोलनय् नं दलितत नापनापं न्हापांनिसें दुगु खः । आः सुनार प्रधान काण्डं यानाः नेवाः व दलितत नापं वने हे मफइगु अवस्था ब्वलना वयच्वंगु दु ।

थुगु काण्डयात कयाः निगू पक्षया दथुइ थवंथवय् संवादया माध्यमं थःथःपिनिगु कमि कमजोरीयात स्वीकार यानाः आवंलि यायेमखु अले निगुलिं पक्षं छम्हेस्यां मेम्हेसिया मुद्दाय् समर्थन याना वने धकाः प्रतिवद्धता प्वंकेगु ज्या जूगु खःसा छगू कथंया न्हूगु सन्देश वनीगु खः । तर दुःखया खँ अथे जुइ मफत । दलितय्गु कारणं हे थ्व जुइ मफुगु खः । वार्ताया नितिं निगू कथंया कुतः जुइक जुइकं दलितत बिस्युं बिस्युं वना सम्पर्कय् च्वनेगु ज्या मयाःगुलिं थौंया अवस्था ब्वलंगु खः ।

देशय् कोरोना महामारी जुया थगुने लकडाउन व थुगुसी निषेधाज्ञाया इलय् छेँ थुवाः नेवाःतय्सं बालं च्वनीपिंपाखें यक्व दुःख तायेकाच्वंगु खः । थज्वःगु हे इलय् दलिततपाखें गुगु कथं योजनाबद्ध रुपय् कुतः जुल सुनार प्रधान काण्ड । थ्व ईया ल्याखं पाय्छिगु मखु । मेगु इलय् जूगु खःसा थ्व सामान्य कथंया घटनाया रुपय् नेवाःतय्सं नं नाला काइगु जुइ । तर परिस्थिति मेगु हे लानाच्वंगुलिं उकियात दलिततय्सं गम्भीर जुया बिचाः याये मफुत । अले नेवाःतय्सं नं थुगु मुद्दायात गुगु कथं दलित विरोधी कथं प्रस्तुत मजूसे छेँया क्वथा बालं कायेगु बिइगु नाप जक स्वाकाः यंकेमाःगु खः तर अथे मजूसे नेवाःतय्त राज्यं यानाच्वंगु दमनया छगू रुप कथं नाला कायेगु ज्या यात थ्व नं गलत जूगु दु । उकिं निगुलिं पक्षं गलत जूगु दु कमि कमजोरी जूगु दु । अले उकी राज्य पक्षं झन म्हितेगु ज्या जूगु खनेदु ।

आः नं लाःनि दलित व नेवाःतय्गु दथुइ सम्वादया माध्यमं छगू न्हूगु सन्देश बिइत । उकिया नितिं न्हापा नेवाःतय्सं वार्ताया निंतिं संस्थागत कुतः याःगु थें आः धाःसा दलिततय्सं यायेमाः । न्ह्याथेंजाःगु विवाद नं संवादं ज्यनी धाःसा थ्व ज्यनीमखु धाये मज्यू । यदि संवदाया माध्यमं दलित व नेवाःतय्सं छगू सन्देश बिइ मफत धाःसा कन्हय् दलित आन्दोलनय् नेवाःत वन धाःसा नेवाःतय्सं नेवाःतय्त हे ब्वःबिइगु अवस्था वइ । अले नेवाः आन्दोलनय् दलितत वन धाःसा दलिततय्सं हे दलिततय्त ब्वःबिइगु अवस्था वइ । थ्व निगू पक्षयात दीर्घकालिन लिच्वः लाकीगु संभावना दु । उकिं थ्व इलय् दलिततपाखें सम्वादया नितिं संस्थागत कुतःया आवश्यकता दु ।

सम्बन्धित बुखँ

LEAVE YOUR COMMENTS