सिद्धान्तया तरवार खतं नइ

चिकित्सा शिक्षा गुणस्तरयुक्त जुइमाः । सर्वसुलभ जुइमाः । थौं डाक्टर ब्वनेत लखौं, करोडौं ध्यबा फुकेमाः । सामान्य जनतां थौं चिकित्साशास्त्र ब्वने फइमखु । मेडिकल कलेज चायेकेगु । अन्धाधुन्ध ध्यबा कयाः विद्यार्थी भर्ना कायेगु । मेडिकल शिक्षा विकासया नामय् थौं होडबाजी जुयाच्वंगु दु । चिकित्सा शिक्षां देशय् आवश्यक व योग्य चिकित्सकत उत्पादन याये ।

पवित्र उद्देश्य कायेमाःगु खः । तर थौं अथे जुयाच्वंगु मदु । चिकित्सा शिक्षाया द्रुत विकासया नामय् देशय् थौं मेडिकल माफियातय् हावी जुयाच्वंगु दु । चिकित्सा शिक्षा फयांफक्व ध्यबा जुकेत स्वइपिं व्यापारीतय् फन्दाय् लानाच्वंगु दु । गुणस्तरीय चिकित्सा सेवा थौं छगू निगू सहरय् सीमित जुयाच्वंगु दु ।

देय्या ग्रामिण व सुदूर क्षेत्रय् सामान्यस्तरया चिकित्सा सेवा तकं थ्यंके फयाच्वंगु मदुनि । सहरी क्षेत्रय् नं चिकित्सा सेवा थौं सर्वसाधारण जनताया पहुँचं पिने । चिकित्सा सेवाया नामय् लुटचन्त्रया राज जुयाच्वंगु दु । चिकित्सा शिक्षाया क्षेत्रय् खने दयाच्वंगु विकृति विसंगतिया अन्त्य जुइमाः । चिकित्सा शिक्षा गुणस्तरीय जुइमाः ।

चिकित्सा सेवा जनस्तरय् थ्यनेमाः । इत्यादि माग तयाः डा. गोविन्द केसी हाकनं अनशनय् च्वंगु दु । डा. केसी तःक्वः अनशनय् च्वनेधुंकल । डा. गोविन्द केसीया अनशनं हाकनं छक्वः देय्या राजनीतिक वृत्तयात क्वाका बिउगु दु । खतुं डा. गोविन्द केसीया माग चिकित्सा सेवा सुविधा, गुणस्तर सम्बन्धी खः । राजनीतिक मखु । तर । दुर्भाग्य ।

डा. गोविन्द केसीया अनशन बुलुहुं राजनीतिक विवादय् फँसे जुइगु सम्भावना ब्वलनाच्वंगु दु । डा. गोविन्द केसीया अनशनप्रति सत्ता पक्षं समर्थन क्यनाच्वंगु मदु । मेखेर प्रतिपक्षं जोडदार समर्थन क्यनाच्वंगु दु । थुकथं गोविन्द केसीया अनशन राजनीतिक द्वन्द्व, तानातानी विषय जुइगु सम्भावना अप्वया वनाच्वंगु मदु । तर सत्तापक्ष थौं संयमित जुइमाःगु ई वःगु दु ।

प्रतिपक्षं समर्थन यायेवं स्वयेमाःगु विषयया गरिमायात बेक्वः मिखां स्वये मजिउ । राजनीतिक खेमां थःथःगु समर्थन, विरोध क्यनाः थःथःगु राजनीतिक गणितकथं भूमिका म्हिताच्वनी । प्रतिपक्षं समर्थन क्यनेवं डा. केसीया मागयात प्रतिपक्षं थंगु वा न्ह्यब्वःगु चुनौति, हाथ्या खंके मजिउ । डा. गोविन्द केसीं न्ह्यब्वःगु माग, विषय गुलितक जायज जू, मजू सत्तापक्षं उकिया स्वतन्त्र मूल्यांकन यायेमाः ।

थःगु विवेकपूर्ण निर्णय बीमाः ।थौं देशय् कम्युनिष्ट सरकार । अभूतपूर्व जनमत थौंया सत्तायाके दु । मजबुत, सशक्त सरकार । देशय् थौंया सत्तायात जनतां भोट बिउगुया आधार कम्युनिज्मया सैद्धान्तिक आधार खः । थौं विजयी सत्तासीन नेतातय्सं कम्युनिज्म, माक्र्सिज्मया गर्व याइ । दावी याइ । सर्वसाधारण जनतायात शोषणं मुक्त याये । आर्थिक समानता, न्याय बी ।

वर्गीय विभेद अन्त्य याये । जनपक्षीय, प्रगतिशील ज्याझ्वःत बी । देय्यात समृद्धि बी । थौं नेतातय्सं भाषण याइ । कम्युनिज्मया सैद्धान्तिक आधार उद्देश्य दइ । तर भाषणं जक उद्देश्य पूवनीमखु । अन सिद्धान्त ब्वसा जक जुइ । छलछामया खेल जक जुइ ।डा. गोविन्द केसीया चिकित्सा विषयया माग ठीक वा बेठीक । व थःगु हे थासय् दु । दइ ।

तर थौंया सत्तां देशय् थःगु राजनीतिक सिद्धान्त अनुकूलया विधेयक, नीतित हयेमाः । कम्युनिज्म, माक्र्सिज्म, समाजवादी सिद्धान्तया आधाराय् चिकित्सा विधेयक वयेमाल । अक्षरस सिद्धान्तया पालना जुइमाल । अले स्वतः कार्यक्रम प्रगतिशील, जनपक्षीय जुइ । डा. गोविन्द केसीया माग स्वत पूरा जुइ । डा. गोविन्द केसीया सन्तोष, असन्तोषं अले छुं याये फइमखु । सिद्धान्तवादीतय्सं धाइ ।

छम्ह । सत्तापक्षीय हक्की सांसदं संसदय् धाइ, ‘डा. गोविन्द केसी सु ? चिकित्सा नीति थथे जुइमाः धकाः निर्देशन बीत ? नीति तय यायेगु ज्या ला विज्ञ, योजनाकारतय्सं याइ ।’ खः सांसदज्यू ! देशय् नीति नियम, योजना, सिद्धान्त तय यायेगु ज्या विज्ञतय्सं यायेमाःगु खः। तर देय्या योजना फुक्क थौं माफिया, भ्रष्टाचारीतय् ल्हाती ! थौं राजनीतिक माफियातय् ढाल ! सिद्धान्तरया तरवार म्यानय् । खतं नयाच्वनी ।

डा. गोविन्द केसीया माग चिकित्सा सेवा सुविधा, गुणस्तर सम्बन्धी खः । राजनीतिक मखु । तर । दुर्भाग्य । डा. गोविन्द केसीया अनशन बुलुहुं राजनीतिक विवादय् फँसे जुइगु सम्भावना ब्वलनाच्वंगु दु । डा. गोविन्द केसीया अनशनप्रति सत्ता पक्षं समर्थन क्यनाच्वंगु मदु । मेखेर प्रतिपक्षं जोडदार समर्थन क्यनाच्वंगु दु ।