ने. सं. ११४४ कछलागा पारू -

स्वापू छगू जन्मय् जक जुइमखु

हरे बाबा छु पाप याना वयागु जुइ ? छ थेंज्याःम्ह नाप हनाच्वने माल । थथे धाइगु झीसं न्यना हे वयाच्वनागु दु । थुपिं ला न्हय्गू जन्मया शत्रु थें च्वं, लिपाया जुनी नं छपिं थेंजाःपिं मांबौपिं दयेमाः, जन्मं जन्म तक थथे हे नाता स्वानाः च्वनेमाः आदि आदि खँत झीसं धया वयाच्वन । थुकथं धायेगु जक याः कि धात्थें जुइगु नं खः ले ? कर्म वा ज्याखँ हरेक प्राणीं छकः जक याइगु खः ला ? छगू जन्मय् जक स्वापू दइगु खः ला ?
थन गुम्ह नापं पलख जक स्वापू दइ ।

गुलिसियां लिपा दँ दँ तक नं स्वापू दइ । अझ सछि दँ तक नं छम्ह हे मनू नापं हनाच्वनेमाली । थ्व छगू जन्मया खँ जुल । थ्व अनित्य संसार । न्ह्याम्ह हे जूसां छन्हु मदया वनी । व नापं हानं थःगु स्वापू दइ कि मदइ । छु जन्म छकः जक जुइगु खः ला ? थुकी थीथी कथंया मत दु । जातक बौद्ध ग्रन्थ खः । थुकी बोद्धिसत्वया दिन चर्चाया बयान दु ।

जातकय् सत्वप्राणीया स्वापूयात क्यनातःगु दु । थ्व छगू जन्मय् जक मखु, जन्म जन्मान्तर तक छम्ह नाप मेम्ह छगू पुचः नापं मेगु पुचःया स्वापूयात क्यनातःगु दु । जातक तथागत बुद्धं कनाबिज्याःगु खँ खः । थुकी वसपोलया न्हापाया खँ दुथ्याः । थुकी वसपोल छु कुलय् गुगु कुलय् गन जन्म कया बिज्यात ? वसपोलया सु सु नापं स्वापू दु धइगु खँ उलाबिज्याःगु दु ।

बुद्धकालय् तथागत स्वयम बुद्ध जुया बिज्यात । थुगु इलय् वसपोलया जन्म जूगु जुजु शुद्धोदन व मायादेवीया कूलय् जुल । वसपोलयात पालन पोषण प्रजापति गौतमीं यानाबिज्यात । यशोधरा नापं इहिपा जुल । व पाखें राहुल पुत्र नं बुल । दरवारय् छण्डक सारथी कन्थक सल नाप स्वापू दत । गृह त्याग यायेवं ऋषिमुनि नापं परिवारजनपिं नापं नापलात ।

बुद्धत्व प्राप्ति लिपा अग्रसावकपिं दुथ्यात । सारिपुत्र व मोदगल्याण लिसें आनन्दं स्थविर नापं द्वलंद्वः भिक्षुपिं दत । भिक्षुपिं जक मखु, भिक्षुणीपिं नं दुथ्यात । थुगु इलय् जुजुलिसें प्रजागणपिं नाप सवपू दत । गुलिं स्वत्तापन्न जुल । गुलिं सकुदागामी । गुलिंसिन अनागामी फल प्राप्त यात । गुलिं ला अरहत्त हे जुल ।

थुगु इलय् लखौं लख मनूत जाति जरा मरणं मुक्त जुल । उगु इलय् सकलें सत्व प्राणीपिं मुक्त जुइ मफुत । देवदत्त तथागत नापं जीवन हन । तर मृत्यु लिपा नरक भोग यायेमाल । थुकथंं बुद्धकालय् तथागत नापं जीवन हंपिं वसपोल हितैषी जूपिं वसपोलया धर्मयात नाला काःपिं जक मखु, वसपोलयात बैरीभाव तया जूपिं सत्व प्राणीपिं नापं तकं न्हापाया जन्मय् वसपोल नापं स्वापू दुगु खँ न्ह्यथनातःगु दु ।

थुगु खँया लागिं जातकया छुं छुं घटना न्ह्यथने । सारिपुत्र बौद्ध शिक्षा अध्ययन याइपिं सकसिनं म्हसीकूगु नां खः । वसपोल तथागत बुद्धया अग्रश्रावक खः । जातक बोद्धिसत्वपिनिगु ईया घटना खः । थुगु इलय् सारिपुत्र स्थविर छु छु कूलय् जन्म काल धइगु खँ स्वये । लमकसक जातकय् वसपोल महामात्य जुयाः जन्म जुयाबिज्यात ।

जन्म गब्लें गन छु कूलय् जुइ धाये फइमखु ।
तर न्ह्यागु हे थासय् न्ह्याःगु हे इलय् न्ह्याथाय् हे जन्म जूसां थःगु संस्कार व कर्म कथं जन्म जूवनी । न्हापाया जन्मय् स्वापू दुपिं नापं जीवन हनेमाल ।

अदसत जातकय् ब्रम्हचारी । पोतसिलओली जातकय् गुरु दराज, सुत्तसत्य जातकय् द्यः, पनक जातकय्, पण्डित नाण्डेमि गराज जातक व कोरणदीय जातकय् ब्राम्हणया कूलय् जन्म जुल, खरपुत्र जातकय् सलया योनीइ । सतकेतु जातकय् चाण्डालपुत्र नां जुल । थ्व सकतां जातकय् तथागत बुद्ध नं जन्म जुयाः बिज्याःगु खँ न्ह्यथनातःगु दु ।

गुबलें तथागत पुरोहित जुया बिज्यात । गबलें मृहराज देवराज शंक्र अले गबलें बिछ्यदेवता । थुगु इलय् नं सारिपुत्र महास्थविर नाप तथागतया क्वातुगु स्वापू दु । सारिपुत्र लिपा स्वयम आनन्द स्थबिर तथागतया सेवक बुद्ध कालय् जक मखु, बोधिसत्वया इलय् नं वसपोलया स्वापू दु ।

अझ छगू जन्मय् जक मखु, तःगूमछि जन्मय् वसपोलपिं नाप नापं जीवन हनाबिज्याःगु दु । बोधिसत्वया जन्म जूगु इलय् आनन्द स्थविर छु छु कुलय् जन्म जुयाबिज्यात । थ्व नं छकः स्वये । नांदिय निगराज जातक, आवरिय जातक, तच्सार जातक, अभिसेन जातक, सुतनु जातक, कुकल जातक, विजजाधर जातक, हरितज जातक, उद्धान जातक, गंगमाल जातक आदिइ आनन्द स्थाविर जुजु जुयाबिज्यात ।

जुजु नं छगू देय्या मखु । छगू हे योनीइ मखु । थीथी इलय् थीथी थासय् थीथी योनीया जुजु जुल । वसपोल जुजु जुयाबिज्याःगु इलय् तथागत गबलें तपश्वी गबलें पण्डित गबलें सक्र, गबलें अमात्य जुयाबिज्यात । सुमंगल जातकय् तथागत मुद्ध जुजु जुयाबिज्यात । आनन्द स्थविर छम्ह गथु । निम्ह मिले जूपिं पासापिं जुल ।

मणिकुण्ड जातकय् आनन्द स्थविर कौशल जुजु जुल । तथागत बाराणशी जुजु । थुकथं वसपोलपिं जन्मं जन्म तकं नापं च्वनाबिज्यात । तथागतया जन्मदाता मां बौपिं नं बुद्धकालय् जक मां बौ जुयाबिज्याःगु मखु । बोधिसत्वया इलय् नं वसपोलयापिं मांबौ हे जुयाबिज्याःगु दु । कोषविय जातकय् बोद्धिसत्वया जन्म वसपोलपिनि कोखं हे जूगु खः ।

गंगमाल जातकय् बोद्धिसत्वया जन्म मायादेवीया कोखं जुल । थुगु इलय् नं मायादेवी लानी खः । बोद्धिसत्व कुमार गुम्ह लिपा जुजु जुल । मां बौ जक मखु, तथागतया जीवन नापनापं जीवन हंम्ह यशोधरा नं खः । गुम्हेसित राहुल माता कथं नं म्हसिउ । गंगमाल जातक, कुम्मासपिण्डी जातक, सुसिम जातक, कुम्हाकार जातकय् यशोधरा बोद्धिसत्वया अर्धांगिनी जुयाबिज्यात ।

छक्ववाल जातकय् झंगःया योनीं जन्म जुया नं नापं जीवन हन । देवदत्त नापं बोधसत्वया स्वापू नं स्वये । महाकपिं जातकय् देवदत्त दुश्म माकः जुल । कपि जातकय् खँ मन्यंम्ह माकः जुल । मनोज जातकय् ध्वं । शालीक जातकय् मसःम्ह बैद्य । लुतुकिक जातकय् किसि । थुकथं थीथी इलय् देवदत्तया जन्म जुल ।

गुगु इलय् बोधिसत्व नाप स्वापू दुगु जक मखु, हरेक जन्मय् दुष्ट ब्यवहार नं यानाच्वंगु अझ चेतीय जातकय् ला झन देवदत्त बोधिसत्वया बा नं जुल । चुलधम्मपाल जातकय् जुजु तकं जुल । राहुल सिद्धार्थया काय् । व न्हय्दँ दुबलय् प्रबज्जित जुल । बुद्ध शासनय् दुहां वन । तथागतया इलय् जक मखु । कुम्हाकार जातकय् नं राहुल काय् जुयाः जन्म जूगु खँ कनाबिज्याःगु दु ।

अंगुलिमाल बुद्धकालया छम्ह हिंश्रक मनूया पतिंमाः घाना जुइम्ह । गुम्ह तथागतया शरणय् वन । सुतनु जातकय् अंगुलिमाल छम्ह यक्षया कूलय् जन्म जुल । तथागत कुलया मानवत । थुकिं सीदु तथागतया स्वापू अंगुलिमारल नापं न्हापाया जन्म नं जूगु दु । उत्पलवर्णि बुद्धकालया छम्ह स्थविरा । अतिकं बांलाम्ह सुन्दरी ।

उत्पल्वर्णि नं बोद्धिसत्व नापं स्वापू दुगु जातकय्.क्यनातःगु दु । जागर जातकय् उत्पवर्णा देवताया कूलय् जन्म काल । कुम्हाकार जातकय् कुम्हाःया म्ह्याय् । सिंहपुप्फ जातकय् देवकन्या जुयाः जन्म जुल । थुकथं हे संघय् दुहां वःपिं थीथी कथंया भिक्षुपिं नापं नं बोद्धिसत्वया स्वापू क्यनातःगु दु । बुद्ध कालय् प्रबज्जित जुया नं लोभी स्वभावया भिक्षुपिं दु ।

थुपिं जातकय् कोया योनीइ जन्म जूपिं खः । बुद्धकालय् धाःगु खँ नं मन्यंम्ह भिक्षु गिज्झ जातकय् गिद्ध खः । बोधिसत्वया पालाय् पशु योनीइ जन्म जूसां बुद्ध कालय् मनूया कूलय् जन्म जूगु दु । अथेहे बोद्धिसत्वया इलय् पशु जूपिं गुलिं तथागतया पालाय् नं पशु हे योनीइ जन्म जूपिं नं दु । दिपि जातकय् च्वलेचा जूम्ह बुद्ध कालय् नं च्वलेचा हे जुल ।

चितुवाया योनीइ जन्म काःम्ह लिपा नं चितुवा हे जुल । जन्म गब्लें गन छु कूलय् जुइ धाये फइमखु । तर न्ह्यागु हे थासय् न्ह्याःगु हे इलय् न्ह्याथाय् हे जन्म जूसां थःगु संस्कार व कर्म कथं जन्म जूवनी । न्हापाया जन्मय् स्वापू दुपिं नापं जीवन हनेमाल ।