राष्ट्रगानं सीम्ह म्वाकाबिल…

सरकारं सिनेमा हलय् राष्ट्रिय म्ये थ्वयेकेमाः, अनिवार्य कथं धकाः उजं बी । अथेहे हानं मेगु उजं वइ । पशुपतिइ बःन्हि बःन्हि आरती याइ, बागमति सिथय् । आरती याये न्ह्यः नेपाःया राष्ट्रिय म्ये निं थ्वयेकेमाः । हायेकेमाः । अनिवार्य कथं । सरकारं बाध्यात्मक उजं बी । राष्ट्रिय म्ये देश जनताया प्रतीक जुइ ।

उकी साझा आत्मा दइ । दयेमाः । उकिं राष्ट्रिय म्येया कदर जुइमाः । राष्ट्रिय म्येया कदर धयागु विशेष जुइ । देश, जनता प्रतिया हे कदरया थ्व छुमां जुइ । राष्ट्रिय म्य हालेबलय्, न्यनेबलय् स्वयं देशया जीवन्त अनुभूति जुइ । स्कुल कलेजय् नं राष्ट्रिय गान हायेकेगु चलन दु । अन नं राष्ट्रिय गान हायेकेगुया उद्देश्य विद्यार्थीतय्त नुगलय् राष्ट्रिय भावना क्वातुकेगु खः, जुइ ।

हरेक कार्यक्रम, समारोहय् नं राष्ट्रिय गान हायेकेगु याः । राष्ट्रिय गान हायेकीबलय् मनूत दनेमाः । एक चित्तं ध्यान मग्न जुयाः च्वनेमाः ।
तर राष्ट्रिय गानयात कयाः थौंकन्हय् न्हूगु बहस लुया वयाच्वंग्ु दु । राष्ट्रिय गान हायेकेमाः, उकी निगू मत खनेमदु । तर सिनेमा हलय्, पशुपति आरतीया इलय् राष्ट्रिय गान हायेकीगु, व थाकीयात कयाः प्यखेरं आलोचना जुयाच्वंगु दु ।

थ्व पुरा सरकारया हास्यास्पद ज्याखँ धकाः । राष्ट्रिय गानया मनोमानीढंगं पष््रयोग जुल कि स्वयं राष्ट्रया महत्व ह्रास जुइ । राष्ट्र गानया मर्यादा शिथिल जुइ । राष्ट्रिय गान थज्याःगु राष्ट्रिय गौरव व संवेदनशील म्येयात थनअन मदयेक छ्यलकि उकिया लिच्वः प्रत्युत्पादक जुइ । सकारात्मक जुइ मखु । थ्व खँय् सरकारयात विद्वानवर्गतसें चेतावनी बी । सतर्क याइ ।

जबतक देश दुने दुगु सम्पूर्ण जातजाति, भाषा, संस्कृति, कला प्रति राज्यं न्याय बीमखु, सहिष्णुता क्यनी मखु, खुल्ला नीति नालीमखु, राष्ट्रिय म्ये मात्र सुमधुर संगीत जक जुइ, राष्ट्रिय भावना, अनुभूतिया छुंमा जुइमखु ।

राष्ट्रिय म्येयात उखेंथुखें मिखा तिस्सना छ्यलेगु सरकारया अठोज, निर्णयं जनताय् मेगु शंका नं थनाबिउगु दु । थौं राष्ट्रियता सशक्तीकरणया नापं वर्तमान सरकारं महेन्द्री राष्ट्रियताया भूत थनेत ला स्वःगु मखुला ? देश प्रतिया अनुरागया प्रतीक कथं मछ्यसे महत्वाकांक्षी शासकतसें राष्ट्रिय म्येयात भय, त्रास थनेगु ख्याच्वःया रुपय् छ्यल ।

जनतायात अति राष्ट्रवादया भूमरीइ थुना बी । महेन्द्र जुजुया राज्यकाल नं अति राष्ट्रयावादया भूमरीया युगु खः । एक देश एक भाषा, एक भेष । उबलय् राष्ट्रिय गान धयागु जनतायात चीगु खिपः थें, सिखः थें । सिनेमा हलय् राष्ट्रिय गान हायेकीगु, म्ये हायेकीबलय् मदंपिंत पुलिस प्रवेश यानाः दाइ, च्वाइ । ककू ज्वनाः हलं पित हइ ।

उबलय् थाकीगु राष्ट्र गान धाइ । तर राष्ट्रया म्ये हे मदुगु राष्ट्र गान जुइ । मात्र जुजुया प्रशस्तिं । व राष्ट्र गान उबलय् जनतायात क्वत्यलेगु तुपः थें जुइ । अर्थात बन्दूक । देशय् गणतन्त्र वइ । सामन्ती राष्ट्र गानया अन्त जुइ । जनताया राष्ट्र गान हइ । राष्ट्र गान च्वःम्ह ब्याकुल माइला । लय्तःम्ह अम्बर गुरुङ ।

म्ये ल्यःम्ह सत्यमोहन जोशीपिंत थौंया राष्ट्रिय गानया निर्माणय् नेवाः, गुरुङ, राइतय् नं संलग्नता दइ । योगदान दइ । गैर मूलधारवादीतय् कुतलं निर्माण जूगु राष्ट्रिय म्येय् समावेशीता, विविध जातजाति एक्यवद्धताया भाव उजगार जुयाच्वंगु दइ । देशया आम राष्ट्यिताया निंतिं थ्व गौरवया खँ जुइ । तर अझ नं बिचाः यायेमाःगु खँ दु ।

म्ये दुने सकल दुथ्याकाः मिखा तिस्सिना राष्ट्रिय म्ये हालां राष्ट्रियताया औपचारिकता पूवनी ला । प्रदर्शन जुइ । तर जबतक देश दुने दुगु सम्पूर्ण जातजाति, भाषा, संस्कृति, कला प्रति राज्यं न्याय बीमखु, सहिष्णुता क्यनी मखु, खुल्ला नीति नालीमखु, राष्ट्रिय म्ये मात्र सुमधुर संगीत जक जुइ, राष्ट्रिय भावना, अनुभूतिया छुंमा जुइमखु ।

उकिं राज्यं राष्ट्रियता क्वातुकेगु नामं राष्ट्रिय म्ये उखें थुखें याकां छुं नं अर्थ पूर्ण जुइमखु । राष्ट्रिय म्ये दुगु प्रत्येक खँग्वःयात इमान्दार कथं व्यवहारय् छ्यले फुसा जक राष्ट्रिय म्य्े सार्थक जुइ । महसु मात्र रा धुनया वाध्यात्मक प्रयोग महेन्द्रीय राष्ट्रियता थें ख्याच्वःया अस्त्र जक जुइ ।

छगू लुमंकेबहगु खँ– पशुपति बागमतीया किनाराय्, सन्ध्याकालय् आरती सुरु जुइवं बागमती पारी नं यक्व मनूत मुनी । नापं आर्यघाटय् सीम्ह मनू उइत हइ । शयात्राय् नं मनूत हुल दइ । शायद मदुम्ह मनू तःधंम्ह जुइमाः । क्यामरामाय्नत नं खनेदइ । मदुम्हेस्यां शवयात सीपँय् तइ । मि तय्त तयार यानाच्वंगु दु । थ्व हे इलय् राष्ट्यि म्येँ थ्वया वइ । आश्चर्य ।

भयानक आश्चर्य । सिँपँय् ग्वतुकातःम्ह सीम्ह जुरुक्क दनी । सीम्ह सिँपं कुहां वइ । तप्यंक दनी । छातीइ ल्हाः तयाः राष्ट्रिय म्ये हाली । थ्व खनाः अन आरतीइ दयाच्वंपिं सकल मनूत भागाभाग जुइ । ह्वात्त सीम्ह व्यक्ति म्वाना वल धकाः हल्ला जुइ । राष्ट्रिय गानं ला सीम्ह हे म्वाका बिल । हल्ला न्यनी, तर यथार्थय् व शवयात्रा, अग्नी दाहया दृश्य सिनेमा सुटिङ्ग जुयाच्वन, फिल्म सुटिङ्ग ।

सम्बन्धित बुखँ

LEAVE YOUR COMMENTS