अरुण आयोजनाय् न्हय्गू जिल्लाय् टावर

येँ – भारतीय सतलज कम्पनीं दयेकाच्वंगु अरुण स्वंगूगु जलविद्युत परियोजनाया निंतिं आः सतक, ड्याम साइड, पावर हाउस, सुरुगं मार्ग दयेकेगु ज्या न्ह्यानाच्वंगु दु । संखुवासभाया मकालु गाउँपालिका ५ नुम फ्याक्सीन्दाय् ड्याम साइडया ज्या न्ह्यानाच्वंगु दुसा पावर हाउस चिचिला गाउँपालिका दिदिङया पुखुवाय् दयेकाच्वंगु दु ।

आयोजनां ट्रान्समिसन लाइन संखुवासभा, भोजपुर, खोटाङ, उदयपुर, सिराहा, महोत्तरी जुयाः धनुषा यंकेगु खँ धाःगु दु । ट्रान्समिसन लाइनया निंतिं न्हय्गू जिल्लाय् ५१७ गू टावर दयेकीगु जूगु दु । संखुवासभाय् ४३, भोजपुरय् ७९, खोटाङय् ६५, उदयपुरय् १३०, सिरहाय् २५, महोत्तरीइ ९५ व धनुषाय् ७२ गू टावर दइगु खँ सतलज कम्पनीया प्रमुख कार्यकारी अधिकृत अरुण धिमालं धयादीगु दु ।

आयोजनां ट्रान्समिसन लाइन संखुवासभा, भोजपुर, खोटाङ, उदयपुर, सिराहा, महोत्तरी जुयाः धनुषा यंकीगु

थ्व टावर दयेकेगु निंतिं जग्गा अधिग्रहण यायेत सम्बन्धित जिल्ला प्रशासन कार्यालय व नेपाल विद्युत प्राधिकरणयात जानकारी बीधुनागु खँ सतलज कम्पनीं धाःगु दु । अरुण स्वंगूगु जलविद्युत आयोजना प्रधानमन्त्री केपी शर्मा ओली व भारतीय प्रधानमन्त्री नरेन्द्र मोदीं मंकाः कथं वंगु २०७४ वैशाख २८ गते शिलान्यास यानादीगु खः ।

न्यादँया दुने दयेके क्वचायेकेगु लक्ष्य तयातःगु थ्व आयोजनां ९०० मेगावाट विद्युत उत्पादन जुइ । आयोजनाया निंतिं छगू खर्ब २० अर्ब तका खर्च जुइगु अनुमान यानातःगु दु । थ्व आयोजनां प्रभावित छेँयापिंत छखा छेँय् ३० युनिटया ल्याखं निःशुल्क मत बीगु सम्झौता जुयाच्वंगु दु । आयोजनां यानाः २७४ परिवारया छेँ व जग्गा अधिग्रह यानाः थ्यंमथ्यं १ अर्ब २९ करोड दां मुआब्जा बीधुंकूगु दु ।

थ्व आयोजनापाखें नेपालं २५ वर्षय् ३४० अर्ब रोयल्टी, निःशुल्क मत, आयकर, भ्याट व भन्सार शुल्क लाभ काइगु जूगु दु । उत्पादन सुरु जूगु २५ दँ लिपा सतलजं आयोजना नेपाल सरकारयात हस्तान्तरण यायेमाः । थ्व धुंकाः थ्व आयोजना पूवंक नेपाः सरकारया स्वामित्वय् संचालन जुइ ।