सक्वनिसें दक्षिणकालीतक बस सेवा

येँ – वइगु मंगलवाःनिसें सक्वनिसें दक्षिणकाली तक तप्यंक बस सेवा सुरु जुइत्यंगु दु । थ्व बस सेवा नं छगः निगः बसं बीगु मखु, छक्वलं पीगः बसं सक्व–दक्षिणकाली चले जुइत्यंगु खः । बाबा गोकर्णेश्वर यातायातं छक्वलं पीगः बसं सक्व निसें दक्षिणकाली तक सेवा बीत्यंगु खः । थुकिया निंतिं बाबा गोकर्णेश्वरं स्वीगः न्हूगु बस नं हयेधुंकूगु दु । आः थ्व स्वीगः न्हूगु व पुलांगु झिगः बसं थ्व सेवा बीत्यंगु खः ।

कम्पनीं धाःकथं सक्वनिसें स्वंगू रुट जुयाः दक्षिणकालीतक बस वनी । दक्षिणकाली तक वनीगु पीगलं बस सक्वं थली, नारायणटार, जोरपाटी जुयाः चाबही तक वइ । चाबही थ्यनेधुंकूगु रिंगरोड जुयाः न्हू बसपार्क, बल्खु जुयाः छगू रुट चले जुइसा, मेगु रुट चाबही, गौशाला, कोटेश्वर, बल्खु जुयाः दक्षिणकाली वनी । अथेहे मेगु छगू रुट चाबही, गोशाला, रातोपुल, रत्नपार्क, कालिमाति, बल्खु जुयाः दक्षिणकाली वनी ।

दक्षिणकाली तक थ्यंकेगु निंतिं फुक्क रुटय् रुटपरमिट कायेधुनागु खँ कम्पनीं धाःगु दु । थौंकन्हय् बाबा गोकर्णेश्वरया ५० गः बसं रिंगरोड चाःहिलाः जोरपाटी तक सेवा बिया वयाच्वंगु खःसा मंगलवाः न्हूगु बस चले जुइधुंकाः कम्पनीयाके ८० गः बस दइ । कम्पनीं दछि न्ह्यः जोरपाटी तक वनीगु वँचुगु माइक्रोया सिन्डीकेट त्वाःथलाः जोरपाटी तक बस संचालन याःगु खः ।