राहुघाटया मत न्यायेगु सम्झौता

बहुप्रतिक्षित राहुघाट जलविद्युत आयोजनाया मत न्यायेगु सम्झौता (पिपिए) जूगु दु । नेपाल विद्युत प्राधिकणया कार्यकारी निर्देशक कुलमान घिसिङ व आयोजनाया प्रवद्र्धक कम्पनी रघुगंगा हाइड्रो लिमिटेडया प्रबन्ध संचालक श्रीरामराज पाण्डे दथुइ मंगलवाः सम्झौताय् हस्ताक्षर जूगु खः । रघुगंगा हाइड्रो लिमिटेड प्राधिकरणयात शतप्रतिशत शेयर दुगु सहायक कम्पनी खः ।

थ्व आयोजनापाखें उत्पादन जुइगु मत खुला पिक आवरय् प्रतियुनिट १०.५५ तकां व सामान्य इलय् ८.४० तकां न्यायेगु सम्झौता जूगु खः । अथेहे बर्खा यामय् खुला प्रति युनिट ४.५० तकां प्राधिकरणं मत न्याइ । अथेहे दँय्दसं ३ प्रतिशतया दरं च्यादँ तक मतया भाः थहां वनी । भारतीय एक्जिम बैंकया ४ करोड ४० लाख डलरया सहुलियतपूर्ण त्यासाय् थ्व आयोजना दयेकाच्वंगु खः ।

थुकिया लागत ब्याज सहित च्यागू अर्ब ५९ करोड तुइगु अनुमान दु । अर्धजलाशययुक्त थ्व आयोजनां सन् २०२३या जनवरी ३१ निसें मत उत्पादन सुरु यायेगु लक्ष्य तयातःगु दु । भारतया जयप्रकाश एशोसियट्सं ठेक्का कयाः दयेकाच्वंगु थ्व आयोजनाया भौतिक प्रगति १२ प्रतिशत थ्यनेधुंकूगु दु ।

सम्बन्धित बुखँ

LEAVE YOUR COMMENTS