महाबिर पुन नेपाल बैंकया ब्राण्ड एम्बेस्डर

येँ – नेपाःया हे न्हापांगु बैंक नेपाल बैंकं युवा बैज्ञानिक डा. महाविहार पुनयात ब्राण्ड एम्बेसडर दयेकूगु दु । ब्राण्ड एम्बेसडर जुइगु सम्झौताय् म्हिगः नेपाल बैंकया प्रमुख कार्यकारी अधिकृत कृष्णबहादुर अधिकारी व डा. पुनं हस्ताक्षर यानादीगु खः । डा पुन राष्ट्रिय आविष्कार केन्द्रया अध्यक्ष खः । वय्कः न्हूगु सोच दुपिं ल्याय्म्हतय्त उद्यमी दयेकाः देय्या आर्थिक विकासया ज्याय् लगे जुयाच्वनादीम्ह खः ।

वय्कलं हे दकलय् न्हापां पहाडी लागाय् टेलिमेडिसिनया सुरुवात नं यानादीगु खः । हस्ताक्षर ज्याझ्वलय् न्ववानादिसें कार्यकारी अधिकृत अधिकारीं ल्याय्म्हपिंत उद्यमी दयेकेत प्रेरित यानाच्वंम्ह डा. पुन थेंज्याःम्ह व्यक्तित्वयात ब्राण्ड एम्बेस्डर दयेकेगु धयागु गर्वया खँ खः धयादिल ।

अथेहे डा पुनं नेपाःया दकलय् न्हापांगु बैंकया ब्राण्ड एम्बेस्डर जुइखंगु थःगु सौभाग्य जूगु धासें देय्यात समृद्धिया लँय् न्ह्याकेगु ह्वःताः वःगु व थःम्हं नेपाल बैंकया प्रगतिया निंतिं फुगु ग्वाहालि यायेगु प्रतिबद्धता प्वंकादिल ।

डा. पुनया आविस्कार केन्द्रं ड्रोन, बायोमेडिकल, कृषि, शिक्षा, स्वस्थ्य लिसें २० गुलिं मल्याक क्षेत्रय् न्हून्हूगु अनुसन्धानया ज्या यानाच्वंगु दु । वय्कःय एशियाया नोबेल पुरस्कार धाइगु रोमन म्याग्सेसे पुरस्कारं सम्मानित जुयादी धुंकूम्ह खः ।