चिनियाँ दूतावास व सम्पादकतय् दथुइ वक्तव्यवाजी

येँ – अंग्रेजी न्हिपौ दि काठमाडौं पोस्टय् पिहां वःगु छपु लेखयात कयाः नेपाःस्थित चिनियाँ राजदूतावासं पितबिउगु वक्तव्ययात कयाः थीथी पत्रिकाया सम्पादकतय्सं असहमति प्वंकूगु दु । थीथी पत्रिकाया सम्पादकतय्सं छगू वक्तव्य हे जारी यासें राजदूतावासं कुटनीतिक मर्यादा हाचां गायाः वक्तव्य पिकाःगु व छगू पत्रिकाय् पिहां वःगु लेखयात कयाः सम्पादकयात धम्की बीगु व लाञ्छना बिइगु ज्या याःगु खँ धयातःगु दु ।

काठमाडौं पोष्टया मंगलवाःया ल्याखय् चीनय् न्यनाच्वंगु कारोना भाइरसयात कयाः छपु लेख पिहां वःगु खः ।’China’s secrecy has made coronavirus crisis much worse’ शीर्षकय् पिहां वःगु उगु लेखय् चिनिया नेता माओ त्से तुङया म्हुतुइ नं मास्क तयातःगु स्केच तयातःगु खः ।

थुकियात कयाः चिनियाँ दूतावासं कडा आपत्ती प्वंकाः काठमाडौं पोष्टया सम्पादक अनुप काफ्लेया नां हे तोके यानाः सम्पादक काफ्ले चिनियाँ मामिलाय् न्ह्याबलें पक्षपाती जुइगु व चिनियाँ विरोधीतय् भत्तु जुयाच्वंगु खँ धयातःगु खः ।काठमाडौं पोष्टय् पिहां वःगु थ्व लेख धाःसा सुं नेपाली च्वःगु लेख मखु ।

अमेरिकाया पुलांम्ह सरकारी अधिकारी इभो डाल्डेरं च्वयातःगु थ्व लेख दकलय् न्हापां शिकागो ट्रिब्युनं छापे यायेधुंकूगु खःसा थ्व हे लेख मेमेगु पत्रिकाय् साभार जुजुं वयाः काठमाडौं पोष्टं दि कोरिया हेराल्डपाखें साभार यानाः प्रकाशन याःगु खः ।थ्व लेख छापे याःगु कारणं चिनियाँ दूतावासं पोष्टया सम्पादकया नां हे तोके यानाः ख्याच्वः बिउगुलिं नेपाःया थीथी पत्रिकाया सम्पादकत मुनाः दूतावासया विरोध याःगु खः ।

झिंन्हय्म्ह सम्पादकतय्सं मंकाः रुपं पिकाःगु वक्तव्यय् लेख प्रकाशनय् असहमति दुसा उकीया खण्डन यायेगु अधिकार दु, तर सम्पादकयात ख्याच्वः हे बिइगु ज्या कुटनीतिक मर्यादाया हे उल्लंघन जूगु खँ धयातःगु दु । थ्वहे दथुइ नेपाल पत्रकार महासंघं नं छगू वक्तव्य पित बिसें चिनियाँ दूतावासया धापुतिं महासंघया गम्भीर ध्यानाकर्षण जूगु खँ धाःगु दु ।

वक्तव्यय् कुटनीतिक निकायं वक्तव्यपाखें पत्रकारया धम्की बीगु, लाञ्छना बीगु निन्दनीय ज्या खः धयातःगु दु । चिनियाँ दूतावास व सम्पादकतय् वक्तव्यवाजीयात कयाः सामाजिक सञ्जालय् नं पक्ष विपक्षय् यक्व कमेन्ट जुयाच्वंगु दु ।

गुलिसिनं नेपाःया संविधानं प्रत्याभूत यानातःगु प्रेस स्वतन्त्रता व वाक् स्वतन्त्रतायात चिनियाँ दूतावासं हनन यायेत स्वःगु खँ धयातःगु दुसा गुलिसिनं मेपिनिगु देया सार्वभौमसत्तायात आँच वइकथं कयाः नेपाली पत्रिकां पश्चिमा देय्त लिउलिउ जुयाः लेख प्रकाशन यायेमजिउगु खँ धयाच्वंगु दु ।