भरियातय्त नयेत हे समस्या

येँ – छवाः न्यंकं जूगु निषेधाज्ञा लिपा न्हिया न्हिथं ज्या यानाः नयेमाःपिंत समस्या शुरु जूगु दु । विशेष यानाः भारी क्वबीपिं व ज्यामि ज्या यानाः नयेमाःपिंत उकथं समस्या जूगु खः । थ्वहे झ्वलय् समस्याय् लाःपिंत जा नकेगु ज्या नं शुरु जूगु दु । वंगु निन्हु न्ह्यवंनिसें थनया परोपकार स्कुल न्ह्यःने दातापिंसं जा नकेगु शुरु याःगु खः ।

वंगु दँय् नं सरकारं घोषणा याःगु लकडाउन ताःहाकः जुयाः वनेवं ज्यामि ज्या यानाः नयेमाःपिं सतकय् वया फ्वनाः नयेमाःगु अवस्था वःगु खःसा थुगुसी नं निषेधाज्ञाया छवाः लिपा हे मनूत समस्याय् लायेवं थुकथं दातापिसं बिउगु जा नयेत बाध्य जूगु खँ ज्यामितय्सं धाःगु दु ।
काभ्रेया छेँय् जुयाः कालिमाटी तरकारी बजारय् भारी कुबिगु ज्या यानाच्वंम्ह आइते तामाङं ज्या मदयाः दातापिंसं बिउगु जा नयेत थःपिं बाध्य जूगु खँ ‘नेपालभाषा टाइम्स’ यात कनादिल । वय्कःया कथं निषेधाज्ञा जारी मजूतले न्हिथं भारी कुबिगु ज्या दुगु खःसा निषेधाज्ञा लिपा ज्या मदया समस्या जूगु दु ।