बाबा साकोसया वृक्षारोपण

थिमि – बाबा बचत तथा ऋण सहकारी संस्थाया १९ क्वःगु स्थापना दिवसया झ्वलय् संस्थां संस्कृतिमैत्री वृक्षारोपाण ज्याझ्वः याःगु दु । नेवाः संस्कृति कथं थीथी नखःचखःबलय् थीथी कथंया स्वां, हः, सिसाबुसा आवश्यक जुइ । थज्याःगु आवश्यकता पूवंकेगु कथं पर्यावरणीय सन्तुलनया लिसें संस्कृति नं संरक्षण यायेगु कथं संस्कृतिमैत्री वृक्षारोपाण ज्याझ्वः यानागु खँ संस्थाया अध्यक्ष रत्नमान श्रेष्ठं कनादिल ।

ज्याझ्वलय् थिमि नगरपालिकाय् लाःगु चिइप गः (वनदेवी)इ नेवाः नखःचखःबलय् आवश्यक जुइगु बचाः कचाः, न्हाय्कं, च्वाकं, फकं, तिंकथि, अँ, ज्यनाः लप्ते, बःसि, धाले लगायतया २०० माः पिइगु ज्या जूगु खः । ज्याझ्वःया मूपाहाँ मध्यपुर थिमि नगरपालिकाया मेयर मदनसुन्दर श्रेष्ठं थ्व वृक्षारोपण ज्याझ्वलं संस्कृति व परम्पराया संरक्षणय् ग्वाहालि जुइगु विश्वास प्वंकादिसें थिमि नगरपालिकाया संस्कृति संरक्षण सम्बन्धी योजना व कार्यक्रम बारे जानकारी बियादीगु खः ।

ज्याझ्वलय् न्ववायेगु झ्वलय् वय्कलं काठमाडौं उपत्यका विकास प्राधिकरण खारेज यायेमाःगु खँ न्ह्यथँसें प्राधिकरणया औचित्य व प्रयोजन छुं मदयेधुंकूगु खँ धयादीगु खः । ज्याझ्वलय् मध्यपुर थिमि नगरपालिका वडा न.. ४ या वडाअध्यक्ष कुमार श्रेष्ठ, वनउपभोक्ता समितिया अध्यक्ष कृष्णलाल श्रेष्ठ, सामाजिक अभियन्त मोहनमान श्रेष्ठलिसें सहकारीया दुजःपिनि उपस्थिति दुगु खः ।