परलोक दु कि मदु

कुम्हाःया घःचाः थें स्वाना वइ– जन्म व मरण । सिनां गन वनी ले? धाइ, गुलिं स्वर्गलोकय् जन्म जुइ । गुलिं नरकय् । गुलिं पशुयोनीइ अले गुलिं उपाय दुर्गतिइ लाःवनी । अले गुलिं थुगु लोकय् तुं जन्म जुइ । अय्नं थन सु गन जन्म जुल धइगु खँ धाःवःगु मदु। छम्ह निम्ह मनूतय्सं थःपिं पुनर्जन्म जूगु खँ कनी । तर मनू स्वयां न्हापा गन जन्म जुल धइगु खँ धाःसा थौं तकं सुनानं कँ वःगु मदुनि ।

थन बाज्या अजि जक मखु। मांबौपिं सीधुंकूपिं दु। कका-काकी, दाजु-किजा, तःकेहेँ, जःलाखःला नापं काय-म्ह्याय् तकं सीधुंकूपिं दु। अकुशल कर्म याःपिं नरक वनी । कुशल कर्म याःपिंत स्वर्गभोग याकी । थ्व खँ सकसिनं धाइ । तर सिना वनाः सु स्वर्गय् थ्यन । सुनां नर्क भोग याये माल । थ्व खँ थौं तक सुनानं कँ वःगु मदु। थुकिं यानाः परलोक दु कि मदु धइगु खँय् शंका ब्वलंकू ।

यदि धात्थें परलोक दु? परलोक नं भोग यायेमाः धैगु जूसा सिना वंपिसं छाय् धाः मवल ले ? थ्व खँ झीके नं ब्वलं । म्हमस्यूपिं ला छखे तये, थः हितैषी, थः अतिकं यःम्हं तकं छाय् मधाल ले ? थुकथंया शंका नं ब्वलं । थुकथंया शंका पायासि जुजुया नुगलय् नं ब्वलंगु खः । उकिं वं परलोक मदु, कुशल व अकुशल कर्मया फल मदु धयागु धारणा कयाच्वन ।

छन्हु जुजु पायासि आयुस्मान काश्यपथाय् वन । जुजुं अन थःगु धारणा प्वंकल । जुजुया बिचाः न्यन, अनंलि काश्यपं परलोक दु धइगु थीथी उपमा बियाबिज्यात ।

चन्द्र व सूर्यया उपमा । चन्द्र सूर्य सकसिनं खं । चन्द्र व सूर्य लुइगु व बीगु थःगु हे ई दु। तर चन्द्र व सूर्य थुगु लोकय् मदु। थुकिं सीदु परलोक दु ।

अथेनं सिनावंपिंसं थुकिया बारे छाय् कं मवल ले ? थुगु खँयात ध्वाथुइकेत नं आयुष्मान काश्यपं उपमा बियाबिज्यात । नगरबासीं छम्ह खुँयात ज्वन । वयात जुजुया न्ह्यःने थन । जुजुं वयात मृत्युदण्ड बीगु उजं बिल । सतकया छचालं चाःहिलकल । शहरं पिने दक्षिणया लुखाय्यंकल । अन मनू पालेगु थासय् थ्यन । अन थ्यनेवं वया छ्यं ध्यनेत तयार यात । थुगु इलय् वं धाल, ‘फलाना थासय् जिमि सतीपिं दु, जि अन वने । उमित छुं खँ कनावये ।’

व हाला हे च्वन, तर वयात उम्ह मखुनं त्वःतुगु मखु। व हालां तुं च्वन, वया छ्यं पाला बिल । थथे मनू परलोक वनी । वया शतिबन्धु ला लोकय् दु। वं थःम्हं खंगु परलोकया बारे कनेगु इच्छा प्वंकी । तर व अनं वये फइमखु। थः हितैषी शातिबन्धु सुयातं वं थ्व खँ कने फइमखु ।

चःबिया उपमा

छम्ह मनू चःबिया गालय् कुतुवन । जुजुं वयात खन । जुजुं वयात अनं लिकायेके बिल । वयात म्ह म्वःल्हुकल । वया म्ह यचुपिचु याकल । म्हय् चिकं बुकल । सँ नापं दाह्री नं खाकल । मूवंगु तिसा वसलं छाय्पिल । पञ्चकामगुणय् समर्पण याकल । थुकथं वया परिस्थिति हिल । अनं लिपा उम्ह मनू गुबलें चःबिया गालय् कुहां वनीमखु। अथेहे परलोकय् मनूया लागिं मनुष्य लोक दुर्गन्धित खः । उकिं हानं थन लिहां वइमखु ।

त्रयस्त्रिय देवलोकया उपमा

मनूया सछिदँ आयु। त्रयस्त्रिय देवलोकया छन्हु जुइ । उकथं स्वीन्हुया लछि जुइ । झिंनिलाया दछि । त्रयोस्त्रिय देवलोकय् द्वछि दंया आयु दइ । कुशल कर्म याःपिं देवलोकय् जन्म जूवनी । अन थ्यनेवं बिचाः याइ । थन निन्हु प्यन्हु भोग याये । अनया निन्हु प्यन्हु काम भोगय् मस्त जुइ । अनंलिपा थुगु लोकया बारे कंवंसां कने फइमखु। लोकय् थः शान्तिबन्धुपिं मदये धुंकी ।

परलोकया बारे थुइके अःपु मजू । सुनानं परलोक मदु मकाः परलोकय् भोग याये म्वाः धइगु बिचाः यायेफु। तर थथे यायेवं परलोक मदुगु मखु धइगु खँयात आयुष्मान काश्यपं थुकथं उपमा बिया बिज्यात ।

म्हगसःया उपमा

जब न्ह्यः वइ । अले म्हगस म्हनी । म्हगसय् क्यब, वन जंगल, पुखू नं क्यनी । उकी जीवन ताइ । न्ह्यइपुसे च्वनी । तर न्ह्यलं चायेवं अन छुं दइमखु। थःम्हं खंगु थःम्हं वाःचायेकूगु ला थन मदु। सिना वंपिं गन दइ । गनं वया धाः वइ ?

शंखया उपमा

छम्ह शंखबाहक दु। व शंख ज्वनाः गामय् वन । व गांया दथुइ थ्यन । वं शंख पुल । शंखया सः तसकं बांलाः । गांयापिं फुक्कं मूवल । सकलें शंखया सलय् मुग्ध । पलख लिपा वं शंख पुइगु दिकल । शंख बँय् तल । गांयापिंसं शंख काल । पुतु पुइकल । शंखयाके न्यन । ए शंख धाः छंगु सः गनं वःगु? शंखयात कथिं दाल । इमिगु पहः खनः शंखबाहक अजू चाल । इमिगु मूर्खता व दुबुद्धि खन । उकिं परलोक मालेगु नं शंख मपुसें उकिया सः न्यनेत मालेगु थें खः ।

प्वाथय् दुम्ह मिसा । छम्ह ब्राम्हणया निम्ह भरियापिं दु। छम्ह पाखें काय् छम्ह दु। व झिंनिदँति दुम्ह । मेम्हेसिया प्वाथय् दु। थुगु इलय् ब्राम्हण सित । ब्राम्हणया कायम्हं थः चिरिमांयात धाल, बाःयाय गुलि नं धन सम्पत्ति दु। तिसा दु। व दक्वं बाःनं जितः बियादिल । छितः छुं नं मदु। थ्व खँ न्यनाः चिरिमांमं धाल – जि मचा मबूतक पिउ । यदि जि काय् बुल धाःसा छब्व वयात बिउ । म्ह्याय् बुल धाःसा पदचारिका याना वये । तर चिरिमांया खँय् काय्म्ह माने मजू । चिरिमामं थःगु प्वाथय् काय् कि म्ह्याय् सिइकेगु बिचाः यात । वं चुपि कया हल । क्वथाय् वन । थःगु प्वाः चिरि फात । थुकिं याना वया गर्ब नाश जुल ।

खिप्वःया उपमा

छम्ह मनुखं फा लहिनातःगु। छन्हु व मेगु गामय् चाःहिउ वन। वं अन गंगु खिद्वँखन। उगु खि थः फाया लागिं जिउ धकाः बिचाः यात। वं खि दक्वं मुन। कापतय् प्वः चित। उकियात थःगु छ्यनय् तया क्वबिल । लँय् ववं तसकं वा वल । खिप्वः प्यात। वया ख्वालंनिसें बाबा वल । अय् नं वं खिप्वः मत्वःतू । वयात खंक्वःसिनं धिक्कार यात। वयात वँय् कथं काल । थन वं थःगु दृष्टि महिउ। परलोकया बार नं थःगु दृष्टि हिलेमाः । मखुसा दीर्घकाल तक दुःखी जुइ ।

बूसांनिसें कांम्हेसिया उपमा

छम्ह मनू दु। वं बूसानिसें मिखां मखं । वं हाकु, तुयू, म्हासु, छुं रंग ब्वथले मफु। तःधि चीधि नं मखं । नगू, चन्द्र सूर्य नं मखं । उकिं वं सदां धाइ, थन हाकु, तुयू, म्हासु छुं नं रंग मदु। रुप मदु। चन्द्र सूर्य जक मखु। नगु नं मदु। थुकियात सुनानं खंगु मदु। जिं थ्व छुं मखं । थुकि छुं मदु ।

थुकि आयुष्मान काश्यपं मेगु नं उपमा बियाबिज्याःगु दु। गुगु सकतां ब्याख्या मयाये । आयुष्मान काश्यपं जुजु पाय्सियात परलोक दु धइगु खँ प्रष्ट याना बिज्यात । परलोक लाया मिखां खंके फइमखु। मूर्ख अज्ञानीतय्सं सम्पत्ति माला स्वइथें स्वयां परलोक लुइके फइमखु। थुकिया लागिं दिब्य चक्षु प्राप्त यायेमाः । बहुजन हित व बहुजन सुखया ज्याखं यायेमाः । परलोकया बारे मन्थन यायेगु स्वयां अन्धविश्वास व पापदृष्टिं तापाक च्वनेगु। थुकिं हे परलोकय् सुख प्राप्त याकी धइगु खँ आयुष्मान काष्यपं प्रष्ट याना बिज्यात ।