किपुली ज्याथपिंत सितिकं भ्रमण

किपू – किपू नगरपालिका वडा नं ३ या ज्याथःजिथिपिंत स्वक्वःखुसि सितिकं भ्रमण यंकूगु दु । किपू नगरपालिका वडा नं. ३ या ग्वसालय् दँय्दसं धार्मिक व साँस्कृतिक भ्रमण यंकाच्वंगु खःसा शुक्रवाः स्वन्हुया लागि पर्यटकीय व धार्मिक स्थल पोखरा भ्रमणया नितिं वंगु खः ।

शुक्रवाः सुथय् किपू नगरपालिकाया मेयर रमेश महर्जन, उपमेयर सरस्वति खड्का रिजाल, ३ वडाया अध्यक्ष राजेन्द्र महर्जन, १ या अध्यक्ष हर्ष महर्जन व ९ या अध्यक्ष गंगाराम महर्जनपिंसं खादां क्वखायेका, सिन्हः तिकाः बिदाइ याःगु खः । किपू नगरपालिका वडा ३ या ९० म्ह ज्याथजिथिपिंत पोखरा भ्रमणय् यंकूगु खःसा उमित बिचाः यायेत स्वास्थ्यसेवी प्यम्हलिसें नीम्ह स्वयम् सेवकत नं भ्रमणय् दुथ्याःगु दु ।

प्यंगः बसय् वंगु उगु भ्रमण पुचः शनिवाः न्हिच्छि पोखरा चाःहिलाः आइतवाः छाब्दी बाराही मन्दिर दर्शन यानाः लिहां वइगु ग्वसाः खलकं जानकारी ब्यूगु दु । लुमंकेबहःजु थ्वयां न्ह्यः लुम्बिनी, मनकामना व जानकी मन्दिरय् चाःहिका हयेधुंकूगु दु ।