ने. सं. ११४३ चौलाथ्व पारू -

सरकारं स्पष्ट यायेत नेतातय् माग

सरकार–सीके राउत सहमति

येँ – सीके राउत व सरकार दथुइ सहमति जुइवं देशय् छगू कथंया तरङ्ग ब्वलंगु दु । उगु सहमतियात कयाः सत्तारुढ राजनीतिक पार्टीया लिसें नेतातय्सं थःथःगु कथं प्रतिक्रिया बीगु शुरु जूगु दु । म्हीग शुक्रवाः गृहमन्त्री रामबहादुर थापा व स्वतन्त्र मधेश आन्दोलन न्ह्याका वयाच्वंम्ह सीके राउत दथुइ सहमति जुइवं थीथी पार्टी लगायत सत्तारुढ पार्टीया नेतातय्सं हे न्ह्यसः थनाहःगु दु ।

सत्तारुढ नेपाल कम्युनिष्ट पार्टी स्थायी समितिया दुजः लिसें पुलांम्ह गृहमन्त्री भीम रावलं उगु सम्झौतायात माने याये मफइगु खँ धयादीगु दु । थ्व सहमतिं गनं देय् कुचा थलेगु ज्यायात वैधानिकता बीगु जकं मखुला धइगु न्ह्यसः नं वय्कलं थनादीगु दु । म्हिगः शनिवाः रिपोर्टर्स क्लबं ग्वसाः ग्वःगु साक्षात्कार ज्याझ्वलय् न्ववासें वय्कलं थ्व न्ह्यसः थनादीगु खः ।

‘सरकार व राउत दथुइ जूगु सम्झौता लिपा राउतं न्ववायेगु झ्वलय् नेपाःया संविधान कथं शान्तिपूर्ण राजनीतिक प्रतिस्पर्धाय् वयागु धकाः न्ववाःगु जूसा उकियात स्वीकार याये फइ, तर राउतं थःगु सम्बोधनय् अज्याःगु छुं खँ न्ववाःगु मदु । राउतं न्हापा थम्हं न्ववानाच्वंगु राष्ट्र विरुद्ध व देय् कुचाथलेगु अभिव्यक्ति फुक्कं गलत जूगु व उकियात लित कया धकाः छगू शब्द नं न्वमवाः,‘ वय्कलं धयादिल ।

अथे हे पुलांम्ह प्रधानमन्त्री डा. बाबुराम भट्टराईं स्वतन्त्र मधेश गठबन्धन पुचः लिसे जनमत संग्रहया खँ जूगु खः कि मखु धयागु बारे सरकारं स्पष्ट यायेमाः धयादिल । ‘यदि सरकारं जनमत संग्रहयात स्वीकार यानागु खःसा उकियात स्पष्ट यायेमाः’ डा. भट्टराईं धयादीगु दु ।

डा. राउतं थःगु फेसबुकया वालय् ‘स्वतन्त्र मधेशया फुक्कं मुद्दा लित कायेत सरकार सहमत जुल, मधेशया मुद्दायात कयाः जनमत संग्रहपाखें निर्णय यायेत सहमत जुल’ धकाः च्वयादीगु खः । नेता रावलं नं सरकार व राउत दथुइ जूगु सहमति बारे सरकारं स्पष्ट यायेमाःगु माग यानादीगु दु ।

नेपाली कांग्रेसया नेता प्रकाशमान सिंहं सीके राउतलिसे सरकारं अपारदर्शी रुपं सम्झौता याःगु द्वपं बियादीगु दु । शनिवाः पत्रकारतलिसे खँ ल्हासें वय्कलं उगु खँ धयादीगु खः । प्रमुख राजनीतिक दल व उगु दलया सांसदतय्सं तकं मसीक सरकारं गुपचुप रुपं सम्झौता याःगु धासें सिंहं असन्तुष्टि प्वंकादीगु खः ।

वय्कलं राउतलिसे जूगु ११ बुँदे सम्झौता कार्यान्वयनय् वइगु खँय् नं शंका प्वंकादीगु दु । वय्कलं धयादिल, ‘सरकारं मेगु छुं दलयाके सहमति मकासे याःगु सम्झौता गुलि तक कार्यान्वयनय् वइ, व ला लिपा हे जक सीदइ ।’तर सत्तारुढ नेकपाया महासचिव बिष्णु पौडेलं धाःसा विखण्डनकारी शक्तियात राष्ट्रिय राजनीतिया मूलधारय् हयेगु ज्यायात सामान्य रुपं मकायेत व थुकियात महत्वपूर्ण उपलब्धी कथं कायेत इनाप यानादिल ।

ससफो व राजपा सशंकित

सरकार व राउत दथुइ सहमति जुइवं २ नम्बर प्रदेशय् सत्ता साझेदार दल संघीय समाजवादी फोरम (ससफो) व राष्ट्रिय जनता पार्टी (राजपा) सशंकित जूगु दु । पृथकतावादी आन्दोलन याना वयाच्वंम्ह राउतयात मूलधारया राजनीतिइ हयेगु, मेखे रेशम चौधरीयात धाःसा राजनीतिपाखें तापाक तयेगु कथं ज्या जूगु धासें निगुलिं राजनीतिक पार्टी सशंकित जूगु खः ।

मधेशवादी पार्टीतय्सं थुगु घटना शंकास्पद जूगु धासें तत्काल घटनाक्रमयात कयाः बहस यायेमाःगु आवश्यकता तायेकूगु दु । तर निगुलिं पार्टीया अधिकारिक धारणा धाःसा वःगु मदुनि ।