ने. सं. ११४४ ञलाथ्व दशमी -

जनगणना तथ्यपरक मजूगु सांसदतय् द्वपं

येँ – केन्द्रीय तथ्यांक विभागं नकतिनि सार्वजनिक याःगु नेपाःया न्हूगु जनगणनाया लिच्वः तथ्यपरक मजूगु द्वपं सांसदतय्सं बिउगु दु । प्रतिनिधिसभाया सांसदतय्सं उकुन्हु सार्वजनिक जूगु १२ क्वःगु राष्ट्रिय जनगणनाया प्रारम्भिक तथ्यांकया लिच्वः तथ्यपरक मजू धासें आपत्ति प्वंकूगु खः ।

म्हिगः प्रतिनिधिसभा अन्तर्गतया अर्थ समितिया बैठकय् न्ववासें प्रमुख प्रतिपक्षी नेकपा एमालेया सांसद सुरेन्द्र पाण्डे व सत्तारुढ दल नेपाली कांग्रेसया सांसद प्रमिला राईं जनगणनाया लिच्वः प्रति आपत्ति प्वंकुसें हाकनं जनगणना यायेत माग यानादीगु खः ।

सांसद पाण्डें येँया जनगणनाया प्रारम्भिक नतिजा तथ्यपरक मजूगु कारण स्पष्ट यायेत केन्द्रीय तथ्यांक विभागयात माग यानादीगु दु । वय्कल येँय् न्ह्याबलें माइग्रेशन अप्वया वनाच्वनीगु तर उगु अनुपातय् जनसंख्या म्हो जुइगु ज्या जुइ फइ मखु धासें तथ्यांक विभागया प्रारम्भिक नतिजाय् जनसंख्या म्हो जूगु कारण थम्हं मथूगु खँ धयादीगु खः ।

बैठकय् न्ववायेगु झ्वलय् सांसद पाण्डें धयादिल, ‘मेगु जिल्लाय् जनसंख्या अप्वइगु तर येँय् म्हो जुइगु गुकथं जुल ? थुकिं बांलाक स्वयादिसँ, गनं बांलाक गणना मजुल कि वा अस्थायी रुपं माइग्रेट जुयाः पेशा, व्यवसायय् वःपिं मनूत कोभिडया कारणं छेँय् वनाच्वंगु इलय् वा मेगु कारणं येँय् मलूगु खः कि ? छुं ला जष्टिफिकेशन जुइमाल ।’
उकथं हे सांसद राईं राज्यया उद्देश्य व जनतां चाहे जू कथं जनगणना मजूगु धासें हाकनं जनगणना यायेत माग यानादीगु दु । वय्कलं सही तरिकां जनसंख्याया तथ्यांक मवःगु धासें हाकनं जनगणना याये माःगु धापू तयादीगु खः । सांसदतय्सं जनगणना कायेत थःपिनिगु
छेँय् गणकतं मवःगु खँ नं धाःगु दु ।

मेखे केन्द्रीय तथ्यांक विभागया महानिर्देशक नेविनलाल श्रेष्ठं सांसदतय्सं न्यंगु न्ह्यसःया लिसः बीगु झ्वलय् कोरोनाया असहज परिस्थिति जनगणनाय् च्वय्क्वय् जुइ फइगु खँ धयादीगु दु । वय्कलं थ्व प्रारम्भिक नतिजा जक जूगु व फुक्क लिच्वः पूर्ण जुयाः पिहां वइबलय् अझ विस्तृत तथ्य समावेश जुयाः वइगु खँ धयादीगु खः । लुमंकेबहः जू, जनगणनाया थ्व ल्याःयात सर्वसाधारणं नं पत्याः यानाच्वंगु खने मदुनि ।