जनसरकार फुक्क चीकेगु जुइ : गृहमन्त्री

येँ – गृहमन्त्री रामबहादुर थापां जनसरकारया नामय् देशय् अस्थिरता हयेत स्वयाच्वंगु धासें उकियात नियन्त्रण सुरक्षा निकाययात निर्देशन बिउगु दु । वय्कलं धयादीगु दु, ‘थज्याःगु अस्थिरता हयेत स्वयाच्वंपिंत कारबाही यायेत छुं गुगुं नं कथंया
आदेश व निर्देशन म्वाः, एक्सन कायेगु ज्या यानादिसँ ।’

३ नम्बर प्रदेशय् जूगु सुरक्षा प्रदेश स्तरीय सुरक्षा गोष्ठीइ न्ववायेगु झ्वलय् वय्कलं उगु खँ धयादीगु खः । ३ नम्बर प्रदेशय् देय्न्यंकंया तस्कर, भ्रष्टाचारी, डन व फटाहात च्वनाच्वंगु दु धासें उकियात जनतां महसुस याइ कथं नियन्त्रण यायेमाःगु खँ नं वय्कलं धयादीगु दु ।

३ नम्बर प्रदेशया सन्देश देय्न्यंकं वनीगु खँ कनादिसें मेगु प्रदेशय् दुगु थज्याःगु समस्या अथें हे मदया वनीगु खँ नं वय्कलं कनादिल । लिसें वय्कलं राजनीतिक दल, तस्कर, उद्योगी व्यवसायीपाखें वइगु दबाबयात नं अस्वीकार यायेत निर्देशन बियादीगु दु ।