राष्ट्र बैंकं सहकारी नियमन याइगु
येँ (नेपालभाषा टाइम्स)÷ नेपाल राष्ट्र बैंकं चालु आर्थिक दँ २०८०÷८१ या मौद्रिक नीति सार्वजनिक याःगु दु । आइतवाः सार्वजनिक याःगु मौद्रिक नीतिइ सकारी नियमन यायेगु, विदेश वनीपिंसं ज्वना वने दइगु डलर अप्वयेकेगु, आवासीय छेँ न्यायेगु निंतिं कर्जा अप्वयेकेगु खँत नं न्ह्यथनातःगु दु ।
सहकारी नियमनयात विशिष्टिकृत निकाय स्थापना
नेपाल राष्ट्र बैंकं बचत तथा ऋण सहकारी संस्थाया प्रभावकारी नियमनया निंतिं अलग हे विशष्टिकृत नियामक निकाय स्थापना यायेत आवश्यक सहजीकरण याइगु जूगु दु । सहकारी संस्थाया बेथिती लगातार सार्वजनिक जुयाच्वंगु व थीथी असन्तुष्टि सार्वजनिक जुयाच्वंगु अवस्थायात ध्यानय् तयाः केन्द्रीय बैंकं समस्या समाधानया निंतिं आवश्यक सहजीकरण याइगु जूगु खः । मौद्रीक नीतिइ धयातःगु दु, ‘आर्थिक दँ २०८०÷८१या नेपाल सरकाया बजेटय् उल्लेख यानातःकथं बचत तथा ऋण सहकारी संस्थायात प्रभावकारी नियमन व सुपरीवेक्षणया निंतिं आवश्यक व्यवस्था यायेगु जुइ ।’
आवासीय छेँया निंतिं त्यासा अप्वयेकल
राष्ट्र बैंकं थौं सार्वजनिक याःगु चालु आवया मौद्रिक नीतिं आवासीय छेँया निंतिं बीगु त्यासाया सीमा नं अप्वयेकूगु दु । आः न्हापांगु आवासीय छेँ न्यायेबलय्या निंतिं निगू करोड तक त्यासा बीफइगु जूगु दु । न्हापा थ्व त्यासाया सीमा १ करोड ५० लाख जक जुयाच्वंगु खः । अथेहे चालु आवया बजेटय् उल्लेख जुयाकथं बैंक व वित्तीय संस्थापाखे निश्चित सीमा स्वयां अप्वः त्यासा सुविधा कयाच्वंपिं ऋणीतय्सं अनिवार्य रुपं स्थायी लेखा नम्बर कायेमाःगु व्यवस्थाया पुनरावलोकन यायेगु खँ नं मौद्रिक नीतिइ न्ह्यथनातःगु दु ।
विदेश वनेबलय् ज्वना वनेदइगु डलर अप्वयेकल
सार्वजनिक मौद्रिक निंतिं नेपाली नागरिकतय्त विदेश वनेबलय् बीगु सटही सुविधा अप्वयेकूगु दु । आवंलि भारत बाहेक मेगु देशय् वनेबलय् नेपाली नागरिकतय्त राहदानी सुविधाकथं दछिया निक्वः तक २५०० अमेरिकी डलर सटही सुविधा कायेदइगु जूगु दु । थ्वयां न्ह्यः थ्व सुविधा १५०० डलर जक जुयाच्वंगु खः ।
LEAVE YOUR COMMENTS