मानन्धर संघया ६७ क्वःगु बुन्हिया लसताय् थीथी व्यक्तियात सम्मान व सिरपाः
येँ- केन्द्रीय मानन्धर संघया ६७ क्वःगु पलिस्था दिं वंगु मंगलवाः जुल । थनया मरुहिति ब्यांक्वेटय् जूगु ज्याझ्वः संघया सभापति मनोजकुमार मानन्धरया सभापतित्वय् जूगु खः । संघया उपसभापति बद्रीनारायण मानन्धरं लसकुस यानादीगु ज्याझ्वःया उलेज्या मूपाहां संघीय सरकारया सहरी विकास राज्यमन्त्री रामवीर मानन्धरं त्वाःदेवाय् मत च्याकाः यानादीगु खः ।
ज्याझ्वलय् थीथी क्षेत्रपाखें समाज व देय्या निंतिं विशिष्ट योगदान बिया वयाच्वनादीम्ह छम्ह विशिष्ट व्यक्तियात प्रबुद्ध व्यक्तिया सम्मानं सम्मानित यायेकथं थुगुसी बैंक व वित्तीय ख्यलय् ताःई न्ह्यवंनिसें योगदान बिया वयाच्वनादीम्ह नारायणदास मानन्धरयात उगु सम्मानं सम्मानित याःगु खः । ज्याझ्वलय् वय्कःयात संघया सभापतिं बेतालि चिकादीगु खःसा उपसभापतिं दोसल्लां न्ययकोदीगु खः । सचिव गजेन्द्रमान मानन्धरं स्वांमाः क्वखायेकादिसें वय्कःया म्हसीका बियादीगु ज्याझ्वलय् मूपाहांपाखें प्रबुद्ध व्यक्तिया हनापौ लःल्हानादीगु खः ।
उगु हे ज्याझ्वलय् नकतिकि क्वचाःगु १३ क्वःगु साग कासाय् कराते टीम काताय् नेपाःया निंतिं स्वर्ण पदक त्याकादीम्ह प्रविण मानन्धर व तःदँ न्ह्यवंनिसें कार्टुनया माध्यमं समाजयात चेतनामूलक सन्देश बीगु ज्याय् योगदान बियादीम्ह कार्टुनिष्ट रविन साय्मियात हनापौ लःल्हासें विशेष सम्मान याःगु खः ।
अथे हे नांजाःम्ह च्वमिलिसें संस्कृतिकविद् ज्ञानकाजी खिं मानन्धरं वय्कःया अबु मोहनलाल खिं मानन्धरया नामं पलिस्था यानादीगु न्यय्द्वः तका दांया ‘मोहनलाल खिं मानन्धर सिरपाः’ नेपालभाषाया नांजाःम्ह आख्यानकार मथुरा साय्मि व नीन्याद्वः तका दांया ‘मोहनलाल खिं ल्याय्म्ह सिरपाः’ नेपालभाषा टाइम्स न्हिपौया सम्पादक, च्वमिलिसें कवि सुुरेश किरण मानन्धरयात लःल्हाःगु खः ।
२०७५ सालया दँय् एसइइ परीक्षानिसें एमबीबीएस तगिमय् तक उत्कृष्ट ल्याः हयादीपिं भाजु व मय्जुयात नगद, पदक लिसें दसिपौ नं लःल्हाःगु ज्याझ्वलय् संघया बुन्हिया लसताय् जूगु मचा किपा च्वज्याय् उत्कृष्ट जूपिंत शम्भूमान (काकाभाइ)–बसुन्धरा लुमन्ति सिरपाः, टेबुल टेनिस कासाय् उत्कृष्ट मिसा व मिजंयात ‘विभूषणनारायण लुमन्ति कासा सिरपाः’लिसें मचा ब्वाज्या व चेस कासाय् उत्कृष्ट जुयादीपिंत नं दसिपौ व पदक लःल्हाःगु खः ।
ज्याझ्वलय् वइगु दँय् थीथी विधाय् सिरपाः बीगु ल्याखं ज्ञानकाजी खिं मानन्धरं न्यागू लख न्यासः तका, शान्तिकुमारि मानन्धरं छगू लख न्यय्द्वः तका व मदुम्ह प्रा. डा. कृष्ण मानन्धरया नामं छगू लख दांया अक्षय कोषया निंतिं दां लःल्हाःगु खः । मूपाहां, प्रबुद्ध व्यक्तिपाखें सम्मानित व्यक्तित्व व दाता ज्ञानकाजी मानन्धरं नुगःखँ प्वंकादीगु ज्याझ्वलय् कोषाध्यक्ष सन्देश मानन्धरं सुभाय् देछानादीगु खः ।
LEAVE YOUR COMMENTS