हलिं नेवाः दबूया ग्वसालय् ‘हलिं नेवाः न्ह्यःनेया पलाः’ विषयय् तःमुँज्या जुइगु

येँ (नेपालभाषा टाइम्स) – हलिं नेवाः दबू (वल्र्ड नेवाः अर्गनाइजेसन)या ग्वसालय् ‘हलिं नेवाः न्ह्यःनेया पलाः’ विषयय् तःमुँज्या जुइगु जूगु दु। थ्व हे वइगु ने.सं. ११४१ थिंलाथ्व पुन्हि, यःमरिपुन्हिनिसें थिंलागा पारु निन्हुयकं उगु तःमुँज्या जुइगु ग्वसाः खलकं जानकारी बिउगु दु ।

थीथी शोधकर्ता व सम्पदापे्रमीपिंसं ब्वति काये फइगु तःमुँज्याय् सामाजिक, सांस्कृतिक, वाणिज्य व राजनीति नापं नेवाः ख्यलय् तप्यंक स्वापू दुगु थीथी विषयवस्तुइ केन्द्रीत जुयाः सहलह जुइगु ग्वसाः खलकं धाःगु दु । कोरोना भाइरस संक्रमणया विषम परिस्थितियात ध्यानय् तयाः जूम अनलाइनया माध्यमं जु्इत्यंगु तःमुँज्याय् विश्वन्यंकंया पीगू स्वयां अप्वः नेवाः खलः पुचलं ब्वति काइगु जूगु दु ।

तःमुँज्याय् मुख्य रुपं नेवाः समुदायया न्ह्यःनेया लँपु छु जुइ धइगु विषयय् हे केन्द्रीत जुइगु खँ ग्वसाः खलकं जानकारी बिउगु दु । तःमुँज्या ग्वसाः पुचलं पित बिउगु ज्याझ्वःया धलःकथं वइगु ने.सं. ११४१ कछलाथ्व पुन्हितकया दुने तःमुँज्याय् ब्वति काइपिंसं संक्षेप च्वसु दुथ्याकेगु, कछलागा दशमिया दुने संक्षेप स्वीकार यायेगु, थिंलाथ्व नवमिया दुने ज्याझ्वःया धलः घोषणा यायेगु व थिंलाथ्व पारुकुन्हु तःमुँज्या औपचारिक रुपं न्ह्याकेगु ज्याझ्वः तयातःगु दु ।