रामप्रसाद व उत्तरालक्ष्मीयात लाइफ टाइम अचिभेन्ट
येँ(नेपालभाषा टाइम्स)÷केन्द्रीय मानन्धर संघपाखं नेपालभाषा सांगीतिक ख्यःया अतिकं नांजाःपिं कलाकार वरिष्ठ म्येँ हालामि रामप्रसाद मानन्धर व नेपालभाषाया न्हापांम्ह मिसा संगीतकार उत्तरालक्ष्मी मानन्धरयात ‘लाइफ टाइम अचिभमेन्ट’पाखें सम्मान याःगु दु । म्हिगः यलया भोलध्वाखाय् च्वंगु ज्यापु प्रज्ञा भवनय् जूगु सांगीतिक ज्याझ्वलय् मिजंपाखे रामप्रसाद मानन्धर व मिसापाखे उत्तरालक्ष्मीयात वय्कःपिंसं खस् नेपाली व नेपालभाषा सांगीतिक ख्यलय् बियादीगु ज्वःमदुगु योगदानयात कयाः ‘लाइफ टाइम अचिभमेन्ट’पाखें हनेज्या याःगु खः ।
ज्याझ्वलय् मूपाहां येँ महानगरपालिकाया प्रवक्तालिसें १७ वडाअध्यक्ष नविन मानन्धरं निम्हं सर्जकपिंत हनापौ देछानादीगु खःसा संघया नायः सुवर्णमान मानन्धरं दोसल्ला न्ययेकादीगु खः । अथे हे उपसभापति बद्रीनारायण मानन्धरं तपुलिं पुइकाः स्वांमाः क्वखायेकादीगु खः । सांगीतिक ज्याझ्वलय् नांजाःपिं म्यँ हालापिं सत्यनारायण मानन्धर, सुमन शेखर मानन्धर, सरस्वति मानन्धर, गौतमदास मानन्धर, विनोद मानन्धर, सविना मानन्धर, सोहन मानन्धरलगायतया कलाकारपिंसं म्येँ न्यंकादीगु खःसा आर्सिया मानन्धर, हनी मानन्धर, सिचु मानन्धरं हुलाप्याखं न्ह्यब्वयादीगु खः ।
सुरेन्द्र मानन्धरया पुचलं ख्याल न्ह्यब्वःगु ज्याझ्वलय् थँहिति मानन्धर गुथिपाखें यइपुसे च्वंगु अर्केष्ट्रा न्ह्यब्वःगु खः ।
थ्व स्वयां न्ह्यः संघया सचिव गजेन्द्रमान मानन्धरं लसकुस यासें न्ह्याःगु ज्याझ्वःया उलेज्या मूपाहां येँ महानगर प्रवक्ता मानन्धर त्वाः देवाय् मत च्याकाः यानादीगु खःसा ज्याझ्वलय् पाहांकथं झायादीम्ह यल महानगरपालिका ९ वडाया कार्यवाहक वडाअध्यक्ष अमिर महर्जन, ल्याय्म्ह पुचःया संयोजक गजेन्द्रप्रसाद मानन्धर सम्मानित व्यक्तित्व रामप्रसाद मानन्धरं नुगःखँ तयादीगु खः ।
संघया उपसभापति बद्रीनारायण मानन्धरं सुभाय् देछानादीगु ज्याझ्वलय् न्हय्सः नायः अमोघनारायण मानन्धर, संघया निवर्तमान सभापति मनोजकुमार मानन्धर, पुलांम्ह सभापति गोपालकृष्ण मानन्धर, पुलांम्ह उपसभापतिलिसें प्रबुद्ध व्यक्ति पंचकुमारी मानन्धरपिनिगु उपस्थिति दुगु खः ।
LEAVE YOUR COMMENTS