एनिमेशन संकिपा लाखेया म्येँ पितब्वज्या

येँ(नेपालभाषा टाइम्स)- बेलायतय् च्वंगु यन्त्रकलापाखें निर्माण जूगु निगूगु एनिमेटेड संकिपा ‘लाखे’या निपुगु म्येँया पितब्वज्या याःगु दु । एनिमेशन यानाः निर्माण यानातःगु ‘लाखे’ संकियाय् दुथ्याःगु निपुगु म्येँ ‘जय जय लाखे’या वंगु शनिवाः पितब्वज्या याःगु खः ।

येँ महानगरपालिकाया उपप्रमुख सुनिता डंगोल व ख्यालिजुजु मदनकृष्ण श्रेष्ठं मंकाःकथं म्येँया पितब्वज्या यानादीगु खः । ज्याझ्वलय् नवासें उपप्रमुख डंगोलं एनिमेटेड संकिपाया माध्यमं मस्तलिसें ल्याय्म्ह पुस्तायात नं भाषा, कला, संस्कृतिया ज्ञान बी फइगु विश्वास प्वंकादिल । लिसें वय्कलं महानगरपालिकापाखें नं एनिमेशन संकिपा निर्माणया निंतिं थुगुसी बजेट फ्यानागु नं जानकारी बियादिल ।

ज्याझ्वलय् ख्यालिजुजु मदनकृष्ण, वरिष्ठ नाट्यकर्मी मदनदास श्रेष्ठ, नेपालभाषा एकेदेमिया भाइस चान्सलर मल्ल के. सुन्दरं लाखे संकिपाय थीथी पक्षयात कयाः नुगःखँ तयादीगु ख ः ।

मदुम्ह वाङमय शताब्दीपुरुष सत्यमोहन जोशीं च्वयादीगु ‘मजिपाः लाखे’ प्याखंया लिधंसाय् निर्माण यानातःगु एनिमेटेड संकिपाया निर्देशक संयुक्त श्रेष्ठ खः । निर्देशक श्रेष्ठं थ्व स्वयां न्ह्यः नेपाः देय्या नामं संवत पलिस्था याःम्ह राष्ट्रिय विभूति शंखधर साख्वाःया न्हापांगु एनिमेटेड संकिपा निर्माण यानादीगु खः ।

एनिमेटेड ‘लाखे’ संकिपा मदुम्ह गिरिधरलाल मानन्धर, समिर महर्जन व अञ्जना श्रेष्ठं मंकाःकथं निर्माण यानादीगु खःसा एनिमेशन निर्देशक श्रेष्ठलिसें नियुक्त श्रेष्ठं यानादीगु खः ।

नेपालभाषा व खस् नेपाली निगुलिं भासं पिदंगु म्येँय् सतिश महर्जनं सः बियादीगु दु । म्येँ च्वमि नं निर्देशक श्रेष्ठ हे खःसा विश्व शाहीं लसय् हनादीगु खः ।