विराटं मेयर शाक्ययात हनीगु

ख्वप- विराट नेपालभाषा साहित्य सम्मेलन थुगुसी थ्वहे वइगु कौलाथ्व द्वादशिकुन्हु जुइगु जूगु दु । थुगुसी जुइगु ख्वीक्वःगु विराट नेपालभाषा साहित्य सम्मेलन थनया अजिमा पार्टी पालेसय् जुइ ।

नेपालभाषा साहित्यया नांजाःम्ह कवयित्री मय्जु प्रतिसरा साय्मिया प्रमुख आतिथ्यताय् जुइगु ज्याझ्वलय् येँ महानगरपालिकाया प्रमुख विद्यासुन्दर शाक्ययात विशेष पाहांकथं ब्वनातःगु दु । सम्मेलनय् विशेष पाहांकथं झायादीम्ह येँ महानगर प्रमुख शाक्ययात हनेगु ज्याझ्वः नं तयातःगु दु ।
येँ महानगरपालिकां थुुगु शैक्षिक सत्रनिसें विद्यालयस्तरय् महानगरया दक्वं ब्वनेकुथिइ अनिवार्य नेपालभाषाया माध्यमं स्थानीय विषय ब्वंकेगु योजनायात कार्यान्वयन याःगुया कदर यासें विराटं महानगर प्रमुख शाक्ययात हनेत्यंगु खः ।

सम्मेलनय् नेपालभाषा विषयय् कयाः एसइइ व स्नातकोत्तरय् उच्च ल्याः हयादीपिं ब्वँमिपिंत नं थीथी सिरपाः लःल्हाइ । विराटं बिउगु जानकारीकथं सम्मेलनय् स्नातकोत्तर तहय् नेपालभाषा विषयय् दकलय् अप्वः ल्याः हयादीम्ह नेपालभाषा केन्द्रीय विभागया प्रजित शाक्य व एसइइ परीक्षाय् दकलय् उच्च ल्याः हयादीम्ह जगतसुन्दर ब्वनेकुथिया सदीक्ष महर्जनयात सिरपाः लःल्हाइगु ज्याझ्वः दु । शाक्ययात ‘सुरत्न सिरपाः’ व महर्जनयात ‘नेपालभाषा पदकं’ सम्मान यायेत्यंगु खः ।

सम्मेलनय् हे विराटया ज्यासना पुचःया दुजः बाबुकाजी सुवालया चिबाखं मुना सफू ‘गांगु सिमा’या नं पितब्वज्या जुइ ।

सम्बन्धित बुखँ

LEAVE YOUR COMMENTS