मेसीं ह्याट्रिकय् नं रोनाल्डोयात लिउने लाकल

बार्सिलोनाया स्टार कासामि लियोनल मेसी खुक्वःगु बालान डे’ओर उपाधी लसता प्वंकूगु कासाय् ह्याट्रिक यायेवं बार्सा हाकनं लिगया शीर्षस्थानय् थहां वंगु दु । मालोर्कायात ५–२ गोलं बुकेगु झ्वलय् मेसीं थःगु ३५ औं ह्याट्रिक पूवंकूगु खः । बार्साया घरेलु मैदान नोउ क्याम्पय् थुगु कासा सुरु जुइ न्ह्यव मेसीं थः परिवारलिसें बालान डे’ओर उपाधी ज्वनाः मैदानय् वयाः समर्थकत लिसे लसता प्वंकूगु खः ।

मेखेया थ्व ह्याट्रिक लिपा रोनाल्डो ह्याट्रिकय् नं मेसी स्वयां लिउने लाःवंगु दु । न्याक्वः तक बालन डे ओ त्याके धुंकूम्ह रोनाल्डों ३४ गू ह्याट्रिक यानातःगु दु । बालान डे’ओर उपाधीइ नं मेसी स्वयां छगुलिं लिउने लाःवंम्ह रोनाल्डो ह्याट्रिकय् नं मेसी स्वयां छगुलिं लिउने लाःवंगु दु ।
शनिवाः चान्हय् जूगु कासाया न्हय्गूगु मिनेटय् एन्टोनी ग्रिजम्यानया गोलं बार्सिलोनां अग्रता काःगु खः ।

मेसीं कासाया १७ औं मिनेटय् ग्रिजम्यानया पासय् थःगु न्हापांगु गोल याःगु खःसा ४१ औं मिनेटय् मेगु गोल यात । थ्व दथुइ कासाया ३५ औं मिनेटय् मालोर्काया निंतिं एन्टे बुडिमिरं गोल याःगु खः । तर न्हापांगु हाफ क्वचायेत २ मिनेट ल्यं दनिबलय् लुइस स्वारेजं गोल यासें न्हापांगु हाफय् हे बार्सायात ४–१ गोलं अग्रता बिउगु खः ।

निगूगु हाफ सुरु जूगु १९ मिनेट लिपा एन्टे बुडिमिमरं मेगु गोल यासें कासा ४–२या स्थितिइ थ्यंकूगु खः । मेस्सीं ८३ औं मिनेटय् थप छगू गोल यासें ह्याट्रिक पूवंकूगु खः ।

थ्व विजय लिपा बार्सिलोना १५ गू कासा म्हिताः ३४ अंकसहित शीर्षथासय् दुसा ३४ हे अंक दुगु रियल म्याड्रिड गोलअन्तरं यानाः निगूगु थासय् दु । रियल म्याड्रिडं शनिवाः हे जूगु मेगु कासाय् इस्पानोयलयात २–० गोलं बुकूगु खः । रियलया निंतिं राफेल भेरानें कासाया ३७ औं मिनेटय् व करिम बेन्जमां कासाया ७९ औं मिनेटय् छगू छगू गोल याःगु खः ।

सम्बन्धित बुखँ

LEAVE YOUR COMMENTS