असोज १३ गते निसें ए डिभिजन लिग

येँ – अखिल नेपाल फुटबल संघ (एन्फां) वइगु असोज १३ गते निसें शहीद स्मारक ‘ए’ डिभिजन लिग सुरु याइगु जूगु दु । आइतवाः छगू पत्रकार सम्मेलन यासें एन्फां थुगुसी लिग विजेतायात ५० लाख तका दां सिरपाः बीगु घोषणा नं याःगु दु । पत्रकार सम्मेलनय् न्ववासें एन्फा महासचिव इन्द्रमान तुलाधरं उपविजेता टिमयात ३५ लाख व स्वंगूगु थासय् लाःगु टिमयात २५ लाख तका बीगु जानकारी नं बियादिल ।

अथेहे प्यंगू, न्यागूगु व खुगूगु थासय् लाःगु टिमयात छसिकथं १५, ७ व ५ लाख तका व फेयर प्ले टिमयात छगू लाख बीगु जूगु दु ।
लिगय् छगू कासा म्हितलकि एन्फां म्हितूगु क्लबयात ५० हजार तका नं बीगु जूगु दु । लिग तयारीया निंतिं छगू क्लबयात २० लाख तका नं बीगु जूगु दु ।म्याद अफ दि म्याच जूम्हेसित १० हजार तका दां सिरपाः नं बी ।

अथेहे लिगय् उत्कृष्ट मिडफिल्डर, डिफेन्डर, फरवार्डर, गोलकिपर व प्रशिक्षकयात छगः छगः मोटरसाइकल नं बीगु जूगु दु ।वइगु पुस महिना तक न्ह्याइगु कासाय् नेपाल पुलिस क्लब, एपीएफ, आर्मी, थ्रीस्टार, मनाङ मस्याङ्दी, जावलाखेल, फ्रेन्डस, संकटा, मच्छिन्द्र, सरस्वती युथ, च्यासल युथ, एनआटी, बिग्रेड ब्वाइज व हिमालयन शेर्पा यानाः झिंप्यंगू टिमं धेंधेंबल्ला याइ । धेंधेंबल्लाः एन्फा कम्प्लेक्स व सशस्त्रया हल्चोकय् च्वंगु मैदानय् जुइ ।