च्याम्पियन्स लिग- पिएसजी व लिभरपुल त्यात, रियल व सिटी बुत

एजेन्सी- युइएफए च्याम्पियन्स लिग अन्र्तगत मंगलवाः जूगु कासाय् पिएसजी, लिभरपुल, बोरुसिया डर्टमन्ड ,आयक्स व एट्लेटिको म्याड्रिड त्याःगु दु । स्पेनिस महारथी रियल म्याड्रिड व इंग्लिस क्लब म्यानचेस्टर सिटी धाःसा पराजित जूगु दु ।

मंगलवाः चान्हय् ‘समूह ए’ अन्तर्गत जूगु कासाय् फ्रेन्च क्लब पिएसजीं म्यानचेस्टर सिटीयात २–० गोलं बुकूगु खः । पिएसजीया निंतिं इद्रिसा गुईए कासाया च्यागू मिनेट व लियोनल मेसीं कासाया ७४ औं मिनेटय् छगू छगू गोल याःगु खः । मेसीया पिएसजीया निंतिं थ्व न्हापांगु गोल खः । थ्व हे पुचलय् च्वंगु बेल्जियमया क्लब ब्रुगं आरबी क्लब लाइपिगयात २–१ गोलं बुकूगु दु ।

लिगया ‘समूह बी’ अन्तर्गत जूगु कासाय् लिभरपुलं एफसी पोर्टोयात ५–१ गोलं बुकल । लिभरपुलया निंतिं मोहमद सलाह व रोबर्टो फिर्मिनो निगू निगू गोल याःगु खःसा साडियो मानें छगू गोल याःगु खः । एफसी पोर्टोया निंतिं तारेमीं छगू गोल याःगु खः । अथे हे समूह ‘बी’ या मेगु कासाय् एट्लेटिको म्याड्रिडं एसी मिलानयात २–१ गोलं बुकल । एट्लेटिको म्याड्रिडया निंतिं एन्टोनियो ग्रिजम्यान व लुइस सुआरेजं गोल याःगु खः । मिलानया निंतिं राफेल लिओनं गोल याःगु खः । कासाय् मिलानया फ्रान्क केसीं ह्याउँगु कार्ड नःगु खः ।

लिगया समूह ‘डी’ या कासाय् रियल म्याड्रिड घरेलु मैदानय् बूगु दु । रियल म्याड्रिडयात मोल्डेभाया एफसी सेरिफं २–१ गोलं बुकूगु खः । सेरिफया निंतिं जासुरबेक व सेबास्यिटन थिलं गोल याःगु खःसा रियलया निंतिं करिम बेन्जिमा गोलं याःगु खः । समूह ‘डी’या मेगु कासाय् इन्टर मिलान व शाख्तर डोनेस्क गोलरहित बराबरीइ म्हितूगु खः ।

लिगय् जूगु समूह ‘सी’या कासाय् बोरुसिया डर्टमन्डं क्लब स्पोर्टिङयात १–० गोलं बुकूगु दु । अथे हे समूह ‘सी’ या मेगु कासाया आयक्सं क्लब बेसिक्टासयात २–० गोलं बुकल ।

सम्बन्धित बुखँ

LEAVE YOUR COMMENTS