सहलह मदयेक वयेत्यन हाकनं गुथि विधेयक
सरकारं हाकनं गुथि विधेयक हयेगु तयारी यानाच्वंगु दु । भूमि सम्बन्धी व्यवस्थायात व्यवस्थापन यायेगु नामय् सरकारं हाकनं विधेयक हयेगु तयारी याःगु खः । न्हापा नं सरकारं विधेयक हःगु खःसा स्वनिगःया थीथी नेवाः खलः पुचःतय्सं उगु विधेयकं नेवाःतय्सं न्ह्याका वयाच्वंगु थीथी जात्रा, पर्व, संस्कृति आदिइ लिच्वः लाइ धासें विरोध यायेवं सरकारं विधेयक लित काःगु खः ।
वयां लिपा सरकारं स्वनिगःया नेवाःतय् जात्रा, पर्व व संस्कृतिइ लिच्वः मलाइकथं सरोकारवालातलिसे वार्ता यानाः न्हूगु विधेयक हयेगु धकाः धाःगु खः ।तर गुथि विधेयक लित काःगु लांलां दयेधुंकाः नं सरकारं सम्बन्धित पक्षलिसे आतक गुगुंकथंया सुझाव कायेगु ज्या मयाःगु जक मखु सम्पर्क तकं मतःनिगु अवस्था खः ।
थुकिया दथुइ हाकनं सरकारं विधेयक हयेगु धकाः गुगु तयारी यानाच्वंगु दु, उकियात कयाः सम्बन्धित मनूतय्सं धाःसा थःगु चिउताः प्वंकेगु ज्या नं न्ह्याकेधुंकूगु दु । गुथि विधेयक हये न्ह्यः सरकारं सम्बन्धित पक्षलिसे सहलह मयाःगु धइगु हाकनं न्हापाया थेंज्याःगु हे विधेयक हइगु खःला धइगु न्ह्यसः ब्वलनाच्वंगु दु ।
यदि अथे मखु धइगु खःसां अपाय्जिक विरोध जूगु विधेयक हाकनं हयेगु निंतिं सरकारं छाय् सहलह मयात धइगु न्ह्यसः ब्वलनाच्वंगु दु । न्हापा सरकारं हःगु विधेयक समग्र नेवाः जातियात लिच्वः लाकेफइगु जुइवं उकियात कयाः विरोध जूगु खः । उकथं विरोध जुइधुंकाः आः हाकनं हयेत्यंगु विधेयकयात कयाः सरोकारवालातलिसे सहलह यायेगु व विधेयकय् छु छु खँ दुथ्याकेगु धइगु बारे सुझाव कायेमाःगु खः ।
तर सरकारं अज्याःगु ज्या मयाःगुलिं सरकारया नियतप्रति आः नं न्ह्यसः ब्वलनीगु स्वाभाविक खः । जात्रा, पर्व व संस्कृति न्ह्याकेत न्हापा सम्बन्धित दातातय्सं माक्व जग्गाया व्यवस्था याना थकूगु खः । उगु हे बुं वइगु बालीं नेपाःया आपालं जात्रा पर्व संचालन जुयाच्वंगु खः । तर गबलय्निसें गुथि संस्थान नीस्वनाः अज्याःगु राजगुथिया दक्व फुक्कं बुँ जग्गा जमिन गुथि संस्थानया अधीनय् हयेगु ज्या जुल ।
विधेयक वयेकाः जक विरोध यायेगु स्वयां नं आः हे सरकारयात विधेयकय् थ्व थ्व विषय दुथ्याकेमाः धकाः सुझाव, दबाव बीगु ज्या लिबाके मजिल । सरकारं विधेयकयात कयाः सुझाव काःवइ अले जक थःपिंसं सुझाव बीधकाः च्वनेगु ई नं आः मखये धुंकल ।
अबलय्निसें थुकिया लिच्वःकथं नेपाःया गुलिखे जात्रा पर्व दिनावंगु दुसा गुलिखे संस्कृति सिनावंगु दु, न्हनावंगु दु । थज्याःगु खँ सरकारं मसिउगु पक्का नं मखु । अथेखयां नं आः हाकनं गुगु विधेयक हयेगु तयारी यानाच्वंगु दु । उगु विधेयक न्हापाया थेंतुं वल धाःसा आः न्ह्यानाच्वंगु जात्रा पर्व नं न्हना वनिगु सम्भावना उतिकं दु ।
गुथि संस्थानं जात्रा, पर्व गुथिया जग्गायात संरक्षण यायेगु स्वयां नं अज्याःगु बांलाःगु जग्गा रैकर परिणत यानाः उकिं वइगु ध्यबा संस्थानया कर्मचारीतय्त लहित जक पाय्छि जुयाच्वंगु दु । गुकिया लिच्वःकथं जात्रा पर्व न्ह्याकेत तकं संस्थानं माक्व ध्यबा सम्बन्धित पक्षयात बी फयाच्वंगु मदु ।
अथे जुयाः गुलिखे सम्बन्धित गुथियारतय्सं थम्हं हे ध्यबा तयाः जात्रा पर्व न्यायेके मालाच्वंगु अवस्था दु । अथे जुयाः हे सरकारं न्हापा हःगु विधेयकयात कयाः व्यापक विरोध जूगु खः । तर आः वयाः सरकारं हाकनं हयेत्यंगु विधेयक गज्याःगु वइ धइगु खँय् सरकारं आतक नं स्पष्ट मयाःगुलिं सरकारं हयेत्यंगु विधेयकयात कयाः न्ह्यसः चिं थनेगु ज्या शुरु जूगु खः ।
सरकारं विधेयक हये न्ह्यः थःपिंलिसे सहलह यायेमाःगु माग सरोकारवालातय्सं यानाच्वंगु दुसा मेखे सरकारं उकियात कयाः छुं नं कथंया चिउताः तयाच्वंगु मदु । न त छुं लिसः हे बियाच्वंगु दु । न्हापा हःगु गुथि विधेयकयात कयाः विरोध जुइवं नेपाल कम्युनिष्ट पार्टीया हे सांसदतय्सं गुथि विधेयक स्थगन यायेगु निंतिं पार्टी दुने हे दवाब बीगु ज्या जूगु खः ।
तर वयां लिपा सम्बन्धित सांसदपिंसं नं विधेयकयात कयाः पार्टी दुने वा संसदय् सः तयेगु ज्या यानाच्वंगु खनेमदु । अथे धइगु गुथि विधेयक हयेधुंकाः गुगु विरोध तच्वयावंगु खः उकियात मत्थर यायेगु ज्या जकं मजूला धइगु न्ह्यसः नं थन ब्वलनाच्वंगु दु । उगु इलय् गुथि विधेयकया सम्बन्धय् विरोध जूगु जक मखसें द्वलंद्वः जनता सतकय् कुहां वःगु खः ।
सायद विधेयकयात कयाः आतक जूगु दकलय् तःजिक प्रदर्शन थ्वहे जुइमाः । गुकिं यानाः सरकारयात तच्वंक दबाव लाःगु खः । उकिया लिच्वः खः विधेयक लित कायेत सरकार बाध्य जूगु । आः वयाः वंगु छुं न्हिं च्वंगु मन्त्रिपरिषदया बैठकं गुथि विधेयक हाकनं हयेगु निर्णय याःगु दु । खतुं विधेयक हयेगु निर्णयलिसें सम्बन्धित मनूतय् राय कायेगु धकाः नं सरकारं निर्णय याःगु दु ।
तर राय कायेगु निंतिं सरकारं गुगुं नं कथंया कुतः मयाःगुलिं यानाः हाकनं नं गुथि विधेयकयात कयाः थीथी आशंका ब्वलंगु खः । यदि धाथें सरकारं सम्बन्धित सरोकारवालातलिसे च्वनाः गुथि विधेयकयात कयाः सहलह यानाः अन वःगु सुझावयात दुथ्यायेकेगु खःसा थ्व बांलाःगु ज्या जुइफु । गुकिं स्वनिगः लगायत नेपाःन्यंक सञ्चालन जुयाच्वंगु जात्रा पर्व सञ्चालन यायेगु निंतिं अपुइ ।
उकथं हे आः आन्दोलनरत पुचःतय्सं नं आः हयेत्यंगु गुथि विधेयकय् छु गज्याःगु सुझाव बीमाःगु खः । उकिया निंतिं नं तयारी यायेगु ज्या हथाय् जुइधुंकूगु दु । गुथि विधेयकया विरोध लिपा छुं भचा अज्याःगु होमवर्क जूगु खःसां नं वयां लिपा वयाः धाःसा विधेयकय् दुथ्याकेमाःगु खँयात कयाः खास हे सहलह ब्यानाच्वंगु खनेमदु ।
उकिं विधेयक वयेकाः जक विरोध यायेगु स्वयां नं आः हे सरकारयात विधेयकय् थ्व थ्व विषय दुथ्याकेमाः धकाः सुझाव, दबाव बीगु ज्या लिबाके मजिल । सरकारं विधेयकयात कयाः सुझाव काःवइ अले जक थःपिंसं सुझाव बीधकाः च्वनेगु ई नं आः मखये धुंकल । अथे जुयाः गुथि विधेयकयात कयाः आन्दोलन यानाच्वंगु खलः पुचः दथुइ नं सहलह ब्याकाः छु गज्याःगु सुझाव बीमाःगु खः धइगु बारे व्यापक सहलह यायेमाःगु दु ।
लिसे सरकारं आः हयेत्यंगु विधेयक छु गज्याःगु प्रावधानत दुथ्याकातःगु दु धइगु बारे नं अध्ययन यायेमाःगु दु । सरकारं तयार यानातःगु विधेयक झीगु निंतिं गुलि ज्या व गुलि ज्या मवः धइगु बारे आः हे सम्बन्धित विज्ञत नाप सहलह यायेगु ज्या जुइमाः । झीसं सि हे सिउ कानुन दयेकेगु झ्वलय् छ्यलीगु गुलिखे काइते भाषाया कारणं लिपा वनाः आपालं कथं समस्या जुइगु यानाच्वंगु दु । थुखेपाखे नं सकस्यां ध्यान वनेमाः ।
LEAVE YOUR COMMENTS