बिच भलिबलय् स्वर्ण त्याकेगु आशा

येँ – थ्व मंसिर १५ निसें २४ गते तक नेपालय् जुइत्यगु झिंस्वक्वःगु दक्षिण एशियाली खेलकूद (साग)य् बिच भलिबल थुगुसी न्हापांखुसी दुथ्याकूगु दु । पोखराया फेवातालया सिथय् बाराहीघाटय् जुइगु थ्व धेंधेंबल्लाः सहभागी फुक्कं देय्या निंतिं न्हापांगु अनुभव जुइ । फि लायातःगु भलिबल कोर्टय् जुइगु जूगुलिं थुकियात बिच भलिबल धयातःगु खः ।

मिजं व मिसा यानाः निगू विधाय् निगू स्वर्ण, निगू रजत व निगू कास्य पदकया निंतिं भूटान बाहेक खुगू देशं धेंधेंबल्लाः यायेत्यंगु दु । थ्व धेंधेंबल्लाः मंसिर १९ गतेनिसें सुरु जुइ । धेंधेंबल्लाया तयारीया निंतिं मिजं व मिस्तय् नेपाली राष्ट्रिय टिमं वंगु असार १५ निसें प्रशिक्षण यानाच्वंगु दु । वंगु असार ५ निसें ९ गते तक पोखराय् जूगु खुक्वःगु मिसा व न्हय्क्वःगु मिजंतय् बिच भलिबल धेंधेंबल्लाः यानाः सागया निंतिं कासामि ल्यःगु खः ।

घरेलु मैदानय् जुइगु धेंधेंबल्लाखय् नेपाः पदक त्याकेगुली दृढ खनेदु । थ्व धेंधेंबल्लाखय् दुथ्याःगु देय् मध्ये श्रीलंका, माल्दिभ्स व भारतयात पदकया दकलय् दावेदार तायेकातःसां घरेलु मैदानया दर्शकतय् लबः कयाः नेपाली टिमं स्वर्ण त्याकेगु लक्ष्य ज्वनाचवंगु दु । धेंधेंबल्लाःया तयारीया निंतिं नेपाली टिमं श्रीलंकाय् झिन्हुया बन्द प्रशिक्षण नं याःगु खः ।

थ्व झ्वलय् अनया राष्ट्रिय टिम लिसे जूगु प्यगू मैत्रीपूर्ण कासाय् नेपालं छगू त्याकेत ताःलाःगु खः । नेपाली टिमया प्रशिक्षक सुदेश रिमालं घरेलु मैदानया लबः कयाः स्वर्ण त्याकेगु तयारी जुयाच्वंगु खँ कनादिल । वय्कलं धयादीगु दु, ‘होम ग्रान्ड व दर्शकतय् लबः झीत दइ, तर जिमिसं अझं मैदानय् अभ्यास याये खंगु मदुनि ।

छन्हु निन्हुं अभ्यास याये खनीला ?’ थःपिंत म्हितेत मैदान हे समस्या जुयाच्वंगु खँ प्रशिक्षक रिमालं धयादीगु दु । नेपाली टिमय् मानबहादुर श्रेष्ठ व दिलबहादुर सुनार, अथेहे सञ्जय शाह व राजु विकया ज्वः दु । मिस्तय् पाखेया प्रशिक्षक कौशिल्ला कार्की नं कासामितय् निंतिं अभ्यास यायेगु थाय् तयार मजूगुलिं चिन्तित जुयाच्वंगु दु ।

ओलम्पिकय् सहभागी जुइधुंकूगु श्रीलंका बल्लाः टिम जूगु खँ न्ह्यथँसें प्रशिक्षक खत्रीं धयादिल, ‘श्रीलंकालिसे अभ्यास यानाः उमिगु बल्लाःगु व बमलाःगु पक्ष सिइकागु दु । धेंधेंबल्लाःया निंतिं उकथं हे रणनीति दयेकेगु जुइ ।’ नेपाःया मिस्तय् टिमय् कोपिला उप्रेती व मनिषा चौधरीया लिसें विनिता बुढाथोकी व नेविका चौधरीया ज्वः दु ।

सम्बन्धित बुखँ

LEAVE YOUR COMMENTS