म्हगस थें जूगु स्वर्ण

वंगु सोमवाः हङकङय् जुनियर कासामितय्सं ब्वति काइगु ‘स्वक्वःगु एशियाली युवा एथलेटिक्स च्याम्पियन्स’ त्याकूम्ह झिंन्हय्दँया अजित कुमार यादवयात थ्व स्वर्ण धाथें म्हगस थें हे जुल । मजुइगु नं गनं ? धेंधेंबल्लाखय् ब्वति काःवनेगु निन्हु न्ह्यव तक ला हङकङ वनेगु भिसा तकं वयागु ल्हातिइ मलाःनि ।

वं ला उबलय् थः प्रशिक्षक धनीराम चौधरीयात धाःगु नं खः, ‘गुरु जिगु भाग्यय् विदेशय् वनेगु द हे मदु खनी, त्वःता बिउ ।’तर प्रशिक्षक चौधरी हारे मचाः, अले वयात तःधंगु साथ बिल एथलेटिक्स संघया पुलांम्ह महासचिव सुनिल राजवंशीं । महासचिव राजवंशीया साथ जक मदुगु खःसां नं वं थ्व धेंधेंबल्लाः म्हिते तकं मखनीगु खइ, छाय्कि एथलेटिक्स संघ ला राजनीतिक गुटबन्दीं यानाः आन्तरिक विवादय् हे तक्यनाच्वंगु दु ।

संघं ला छुं याःगु हे मखु । महासचिव राजवंशीं हे हङकङ वनेगु निंतिं माःगु फुक्क पत्राचार यानाबिल । तर धेंधेंबल्लाखय् ब्वति काये निन्हु न्ह्यव तक नं भिसा ल्हातय् मलायेवं हाकनं व हे राजवंशीया दौडधूप सुरु जुल । राजवंशीया थ्व हे दौडधूपं यादव हङकङय् ब्वाँय् वनेखन, अले नेपालं ऐतिहासिक सफलता चूलाकेफत ।

यादवया नां आः एशियाली जुनियर स्तरया ३००० हजार मिटर एथलेटिक्सय् स्वर्ण पदक त्याकूम्ह न्हापांम्ह नेपाली धावक कथं इतिहासय् च्वनेधुंकूगु दु । अले थ्व इतिहास च्वयेगु लँ धाःसा धाथें फिल्मया बाखं थें हे जुयाबिल । दकलय् न्हापां ला वं धेंधेंबल्लाखय् थःगु नां दुथ्याकेत नेपाःया एम्योचर एथलेटिक्स संघय् संघर्ष यायेमाल ।

थ्व लिपा भिसा कायेगु निंतिं नं उतिकं सास्ती नयेमाल ।धेंधेंबल्ला छन्हु न्ह्यव सुथय् जक हङकङया एयरपोर्टय् प्रशिक्षक चौधरीलिसें थ्यंम्ह यादवयात कायेत आयोजक पाखें सुं हे मवः । अझ लिबाक थ्यंगुलिं धेंधेंबल्लाखं नां हे चिइकेधुंकूगु खः ला धयागु चिन्ता । होटलय् थ्यंनेवं हाकनं काचाकाचां ग्वसाः खलकय् वनाः थःगु नां निं कन्फर्म यायेमाल ।

कन्हय्कुन्हु ब्वाँय् वने त्ययेकाः नेपाःया नां दुगु जर्सी तकं मदु । ब्वाँय् वने न्ह्यः न्हापांगु कलय् प्राविधिकं धावकतय् जर्सी स्वःवल । सकसिनं थःथःगु देय्या नां अंकित जर्सी फिनावल, तर अन्तर्राष्टिय अनुभवहीन यादवयाके थज्याःगु जर्सी तकं मदु । प्राविधिकयाके अनुनय विनय यानाः बल्ल ब्वाँय् वनेगु स्वीकृति काल ।

धेंधेंबल्ला त्याकेगु सम्भावना दुपिं तःन्हु न्ह्यव हे ग्वसाः देशय् वनाः अनया लकसलिसे घुलमिल जुइगु स्वइ, तर यादवं तसकं हे कठीन परिस्थिति फयेमाल । तर थज्याःगु अवस्थाय् नं वं स्वर्ण त्याकाहल । ‘न्हापां ला जि तसकं ग्याःगु खः, तर जब ब्वाँय् वनेगु सुरु जुल, जिगु ग्याःचिकु गायब जुल, न्ह्यागुसां छगू पदक त्याके धयागु जुल’ वं थःगु अनुभव कंगु दु ।

‘अन्तिम ल्याप न्ह्यः सकसितं लिउने लाकेधुनागु खः, आः जितः सुनां लिलाकः वइला धयागु जक ग्याःचिकु जुल । अन्तिम ल्यापय् सुनां लिलाकेमफइकथं ब्वाँय् वनाच्वना, अन्तिम बिन्दूतक’ वं थःगु ऐतिहासिक विजयया क्षण थुकथं लुमंकूगु दु । ‘जितः झोलाय् नेपाःया ध्वाँय् तयाः बिदा बिउगु खः, जि व झोला मचायेकूसे लिहां वये चाहे मजुया ।

जब ४५ गू देय् न्ह्यःने नेपाःया ध्वाँय् ब्वयेकाः राष्ट्रिय म्येँ हाला, व शब्द बयान यायेमफु ।’सप्तरीया यादवं निर्धारित दूरी ८ मिनेट ३०ः३२ सेकेण्डं पूवंकाः स्वर्ण ल्हातय् लाकूगु खः ।

सम्बन्धित बुखँ

LEAVE YOUR COMMENTS