टोकियो ओलम्पिक २०२० क्वचाल

एजेन्सी- जापानया टोकियोय् जुलाई २३ तारिखनिसें जुयाच्वंगु टोकियो ओलम्पिक २०२० आइतवाः क्वचाःगु दु । थुगु ओलम्पिकय् दकलय् अप्वः पदक त्याकाः अमेरिका शीर्ष थासय्, चीन निगूगु व जापान स्वंगूगु थासय् लात । ओलम्पिकया अन्तिम न्हि कुन्हु चीनयात लिउने लाकाः अमेरिका शीर्ष थासय् थहां वःगु खः । अमेरिकां ओलम्पिकय् ३९ स्वर्ण, ४१ रजत व ३३ कास्य पदक त्याकूगु दु । निगूगु थासय् लाःगु चीनं ३८ स्वर्ण, ३२ रजत व १८ कास्य त्याकलसा स्वंगूगु थासय् लाःगु जापानं २७ स्वर्ण,१४ रजत व १७ कास्य त्याकल । ओलम्पिकया प्यंगूगु थासय् बेलायत व न्यागूगु थासय् रसिया ओलम्पिक कमिटीं थाय् दयेकल ।

थुगुसीया ओलम्पिकय् मुक्कं ६३ गू देसं स्वर्ण पदक त्याकल । अथे हे झिगू देसं म्होतिं नं झिगू स्वर्ण पदक त्याकलसा ८६ गू देसं छगूसां पदक त्याकेत सफल जुल । जापानया १३ दँया कासामि मोमिजी निशिया थुगुसी जूगु ओलम्पिकया दकलय् म्हो उमेरय् पदक त्याकूम्ह कासामि जुल । मोमिजीं स्केटबोर्डय् स्वर्ण त्याकूगु खः । अथे हे कुवेतया सुटिङ कासामि अब्दुल्लाह रसिदी थुगुुसी दकलय् थकालिम्ह पदक विजेता जुल । ५७ दँ दुम्ह अब्दुल्लाह रसिदीं कास्य पदक त्याकूगु खः । ओलम्पिकय् थुगुसी २०६ देसया झिंछद्वलं मल्याक कासामितय्सं ब्वति काःगु खः ।

ओलम्पिकया समापन समारोहय् ओलम्पिकया झण्डा फ्रान्सयात लःल्हाःगु खः । ओलम्पिकया मेगु संस्करण पेरिसय् जुइ । नेपाःया निंतिं धाःसा थुगुसीया ओलम्पिक नं ब्वति कायेलिइ हे सीमित जुल । नेपाःया कासामितय्गु उपलब्धी धइगु राष्ट्रिय कीर्तिमान सुधार यायेगु जक जुलसा छम्ह नं कासामिं न्हापांगु चरणतकं पार यायेमफुत । नेपाःया स्वम्ह कासामि गौरिका सिंह, एलेक्जेन्डर शाह व कल्पना परियारं राष्ट्रिय कीर्तिमानय् सुधार याःगु खः । नेपाःपाखें थुगुसी ओलम्पिकय् न्याम्ह कासामिं ब्वति काःगु खः ।