विश्वकप उत्कृष्ट गोल ल्ययेत मतदान

विश्व फुटबल महासंघ फिफां नकतिनि रसियाय् क्वचाःगु विश्वकप फुटबलया उत्कृष्ट गोल ल्ययेगु निंतिं ह्वःताः बिउगु दु । थुगुसीया विश्वकपय् जूगु १६९ गू गोल मध्ये फिफां झिंच्यागू गोलया धलः पित बिउगु दु । थ्व झिंच्यागू गोल मध्येय् उत्कृष्ट गोल ल्ययेगु निंतिं फुटबलप्रेमीतय्त ह्वःताः बिउगु खः ।

उत्कृष्ट गोल ल्ययेगु निंतिं फिफाया वेबसाइटय् वनाः थःत उत्कृष्ट ताःगु गोलय् मत बीफइ । थ्व भोटिङ जुलाइ २३ तारिख तक याये दइ ।
फिफां पिकाःगु झिंच्यागू गोलया धलखय् लियोनल मेस्सी व क्रिस्टियानो रोनाल्डोया गोलं आःतक अप्वः भोट कयाच्वंगु दु ।

प्रिक्वार्टरफाइनलं हे लिहां वनेमाःसां मेस्सी व रोनाल्डों विश्वकपय् धाःसा उत्कृष्ट गोल याःगु खः । मेस्सीं नाइजेरिया विरुद्ध याःगु गोल व रोनाल्डों स्पेन विरुद्ध याःगु गोल उत्कृष्टया धलखय् लानाच्वंगु दु । अथेहे फ्रान्सया बेन्जामिन पभार्ड व स्पेनया नाचो फर्नान्डेजं याःगु गोलं नं यक्व मत कयाच्वंगु दु ।

जर्मनीया टोनी क्रुसं स्वीडेन विरुद्ध फ्रिकिक पाखें याःगु गोल नं उत्कृष्टया धलखय् दु । अथेहे उत्कृष्ट धलखय् लानाच्वंगु लुका मोडरिक, डेनिस चेरिसेभ, डि मारिया व मोहम्मद मुसां याःगु गोल नं फ्यानतय्सं ययेकाच्वंगु दु ।