ललितपुरं विराटनगरयात बुकल
येँ- एभरेष्ट प्रिमियर लिग अन्तर्गत शुक्रवाः जूगु कासाय् ललितपुर प्याट्रियोट्सं विराटनगर वारियर्सयात ३७ रनं बुकूगु दु । इपिएलय् ललितपुरया थ्व न्हापांगु विजय खःसा विराटनगरया झ्वःलाक स्वंगूगु पराजय खः ।
शुक्रवा टियू मैदानय् जूगु कासाय् ललितपुरं इपिएलया इतिहासय् हे दकलय् अप्वः स्कोर दयेकूगु खः । टस बुनाः न्हापां ब्याटिङ याःगु ललितपुरं न्यागू विकेटया क्षतिइ २२६ रन दयेकूगु खः । ललितपुरया निंतिं श्रीलंकन कासामि सन्दुन विराकोडीं १० गू चौका व स्वंगू छक्काया ग्वाहालिं दकलय् अप्वः ७३ रन व आफगान कासामि अजमतुल्लाह ओमरजाइं ५८ रन दयेकूगु खः ।
कासाय् ललितपुरया कप्तान कुशल भुर्तेलं ३२ रन व योगेन्द्रसिंह कार्कीं २७ रन दयेकूगु खः । ललितपुरया नारायण जोशीं अन्तिम प्यंगू बलय् स्वंगू छक्का प्रहार यानाः अविजित १८ रन दयेकूगु खः । ललितपुरं कासाय् मुक्कं १९ छक्का व १५ चौका थ्वाःगु खः । विराटनगरया निंतिं कप्तान करण केसीं ललितपुरया निगू विकेट काःगु खःसा सिकन्दर राजा, प्रतिश जिसी व दिलशान मुनाविरां छगू छगू विकेट काःगु खः ।
ललितपुरं बिउगु २२७ रनया विशाल लक्ष्य ज्वनाः मैदानय् वःगु विराटनगरं २० ओभरय् ८ विकेटया क्षतिइ १८९ रन जक दयेकेफत । विराटनगरया निंतिं दिलशान मुनाविरां दकलय् अप्वः ५९ रन दयेकल । अथे हे आसिफ शेखं ३७ रन, चन्द्र पउलं २८ व सिकन्दर राजां १४ रन दयेकल । ललितपुरया अलराउण्डर कासामि अजमतुल्लाह ओमरजाइं विराटनगरया प्यंगू विकेट काःगु खः । अथे हे ललित राजवंशीं निगू व योगेन्द्र सिंह कार्कीं छगू विकेट काल ।
LEAVE YOUR COMMENTS