बुद्ध एयरं प्रादेशिक उडान याइगु

येँ – बुद्ध एयरं प्रादेशिक उडान नं याइगु जूगु दु । थ्व हे मंसिर १५ निसें विराटनगर व भद्रपुरपाखें येँ व पोखराया निंतिं उडान यायेगु तयारी जुयाच्वंगु खँ बुद्ध एयरया प्रबन्ध निर्देशक बीरेन्द्रबहादुर बस्नेतं कनादीगु दु ।

भद्रपुर व विराटनगरं पोखरा तकया ट्रान्जिट फ्लाइट सम्बन्धी बुद्ध एयरपाखें आइतवाः ग्वसाः ग्वःगु ज्याझ्वलय् वय्कलं परीक्षण कथं थ्व ज्या खुला तक संचालन जुइगु व कम्पनीं द्यापं फयेमालीगु अवस्था मवल धाःसा थ्व सेवा न्ह्याबलें संचालन जुयाच्वनीगु खँ धयादिल ।

नेपाल भ्रमण दँ २०२० यात बः बीगु ताः तयाः प्रदेश सरकारया इनापय् थुगु सेवा संचालनय् हयेबलय् आन्तरिक व बाह्य पर्यटकतय्त विशेष लबः दइगु खँ निर्देशक बस्नेतं धयादिल । सुरुइ वाःया स्वन्हु थ्व सेवा सञ्चालन जुइ । थ्व झ्वलय् प्रदेश नं. १ या मुख्यमन्त्री शेरधन राईं फुक्कं सेवाय् आमनागरिकया पहुँच दयेकेगु हे समृद्धिया सुरुवात जूगु खँ धयादिल ।

वय्कलं थ्व सेवायात दिगो व प्रभावकारी दयेकातयेत प्रदेश सरकारं म्हितेमाःगु भूमिका निर्वाह याइ धासें विराटनगर विमानस्थलयात स्तरोन्नति यायेगु जानकारी बियादिल । वय्कलं विराटनगर विमानस्थलया धावनमार्गया २४०० मिटर दयेकेगु निंतिं प्रदेश सरकारं पहल यानाच्वंगु खँ नं कनादीगु दु ।

थ्वहे झ्वलय् आन्तरिक मामिला तथा कानुन मन्त्री हिक्मत कुमार कार्कीं बुद्ध एयरं विराटनगर व काठमाडौं निसें पोखरा सेवायात सीधा सेवा सुरु यायेफत धाःसा सेवाग्राहीत अझ लाभान्वित जुइगु बिचाः तयादिल । वय्कलं थ्व क्षेत्रपाखें सेवाग्राहीयात खर्च नं म्हो जुइगु व गन्तव्यय् नं याकनं थ्यंके अःपुइगु जूगुलिं कम्पनीया ध्यान वनेमाः धयादिल ।

उद्योग, पर्यटन, वन तथा वातावरण मन्त्री जगदीश कुसियतं आः हरेक नागरिकया आयवृद्धि जुयाच्वंगु इलय् बुद्ध एयरं ग्यायेमाःगु स्थिति मदुगु खँ न्ह्यथँसें भारतया विहार प्रान्तया पटनाय् जक विमानस्थल दुगुलिं भारतीय नागरिकं नं प्रशस्त लाभ कायेफइगु खँ कनादिल ।

सम्बन्धित बुखँ

LEAVE YOUR COMMENTS