भारतं अवैध खा तस्करी मदित

येँ – भारतं अवैध रुपं खा, खाचा व ख्येँ तस्करी जुइगु अझं मदिउनि । भारतं थथे खा तस्करी जुइगु जुयाः नेपाःया व्यवसायीतय्सं धाःसा द्यापं फये मालाच्वंगु दु । भारतीय सीमापाखें खा दुत हयेत सुरक्षाकर्मीतय्सं पनाच्वंसां दुने दुनेया लँपु जुयाः यक्व हे खा, ख्येँ अवैध रुपं दुहां वयाच्वंगु खँ किसानतय्सं धाःगु दु ।

नेपालं भारतपाखें खा व खाजन्य पदार्थ हयेगु निंतिं प्रतिबन्ध तयातःगु दु । भारतं दंगु भावं खा, खाचा, खाख्येँ वइगु जूगुलिं नेपाली किसानतय्सं थःपिनि उत्पादनया भाः काये मफुगुलिं प्रतिबन्ध तयातःगु खः ।बाँके व बर्दियाया थीथी नाकापाखें नेपाली व भारतीय सुरक्षाकर्मीतय् मिलोमतोय् हे तस्करी जुइगु जुयाच्वंगु खँ स्थानीय किसानतय्सं राससयात धाःगु दु ।

स्थानीयतय् कथं दकलय् अप्वः बाँकेया जानकी गाउँपालिका १या साइगाउँ व खजुरा गाउँपालिका १ या राधापुर पाखें तस्करी जुयाच्वंगु दु । थ्वहे दथुइ पशु क्वारेन्टाइन कार्यालय नेपालगंजं चालू आर्थिक दँय् जक आःतकया दुने अवैध रुपं नेपाः दुत हःपिं २४ हजार ७० म्ह खाचा नष्ट यानागु खँ धाःगु दु ।