चीनं ३० लिटर दुरु बीपिं सा हइगु
येँ (रासस)- प्रदेश नं. ३ या ग्रामीण क्षेत्रया आर्थिक विकास व गरिवी निवारण यायेगु ताः तयाः प्रदेश सरकार व चीनया चाइना एकेदेमि अफ एग्रिकल्चर मेकानाइजेसन साइन्सेस दथुइ प्रदेशय् दुग्ध विकासया निंतिं सहकार्य यायेगु समझौता जूगु दु ।
प्रदेश नं. ३ या मुख्यमन्त्री डोरमणि पौडेलया उपस्थितिइ भूमि व्यवस्था, कृषि तथा सहकारी मन्त्रालयया निमित्त सचिव निर्मल गदाल व चाइना एकेदेमिया प्रमुख इन्जिनीयर उडि सिङ दथुइ सम्झौता पत्रय् हस्ताक्षर जूगु खः ।
थ्व सम्झौता लिपा प्रदेश नं. ३ य् चीनं उन्नत जातया सा हयेगु ज्या जुइ । प्रदेश नं. ३ या आर्थिक मामिला तथा योजना मन्त्री कैलासप्रसाद ढुंगेलं चीनं उन्नत जातया सा हयाः नेपाःया अर्थतन्त्र सुधार यायेगु खँ धयादिल । ‘ताः ईया कुतः लिपा सम्झौता जूगु दु, थुकी प्रदेशया अर्थतन्त्रय् आमूल हिउपाः हइ धयगाु प्रदेश सरकारया बिचाः दु’ वय्कलं धयादीगु दु । आः दछिया दुने झिंस्वंगुलिं जिल्लाय् नश्ल सुधार यानातःपिं सा इनाबीगु ज्याझ्वः दुगु खँ मन्त्री ढुंगेलं धयादिल ।
अथेहे भूमि व्यवस्था, कृषि तथा सहाकारीमन्त्री दावा लामां चीनं सायात माःगु दाना उद्योग, दुग्धजन्य पदार्थया उद्योग व थुकीया बजारीकरण लिसें पशु स्वास्थ्यया क्षेत्रय् नं ग्वाहालि याइगु खँ कनादिल ।
ज्याझ्वलय् न्ववासें चाइना एकेदेमिया प्रमुख इन्जिनियर सिङं प्रदेश सरकारलिसे सहकार्य यानाः न्हि ३० लिटर स्वयां अप्वः दुरु बीपिं सा हयाः माक्व दुरु उत्पादन यायेगु व आधुनिक प्लान्ट हयाः स्वास्थ, सफा दुग्धजन्य पदार्थ उत्पादन व विक्री यानाः स्थानीय अर्थतन्त्र विकास यायेफइगु खँ धयादिल ।
सचिव गदालं प्रदेश सरकारं दुग्ध विकास परियोजना अन्तर्गतं चीनपाखें छम्हेसिया स्वंगू लाख तक तूपिं सा प्यद्वःम्ह नेपाः हयेत्यंगु खँ कनादिल ।
LEAVE YOUR COMMENTS