छगू हे थासय् प्याजया फरक फरक भाः

येँ (नेपालभाषा टाइम्स) – बजारय् प्याजया भाः थहां वनेवं छगू हे थासय् फरक फरक भावं प्याज मियाच्वंगु सीदुगु दु। थनया मनोहरा तरकारि बजाः दुने छगू हे कम्पाउण्डय् प्रति किलो प्याज ६० तका फरक भावं मियाच्वंगु पत्ता लगे जूगु दु ।

येँ महानगरपालिकाया उपभोक्ता हित संरक्षण समितिं याःगु बजाः अनुमगनया झ्वलय् उकथं फरक फरक भावं प्याज मियाच्वंगु पत्ता लगे जूगु खः । मनोहराया तरकारि बजाः दुने छगू पसमलय् अप्वलय् प्रति किलो ६० तकां व उगु हे कम्पाउण्ड दुने मेगु पसलय् प्रति किलो १२० तकां प्याज मियाच्वंगु लूगु समितिं जानकारी बिउगु दु ।

समितिं याःगु अनुगमनया इलय् बजारय् च्वंगु सलेज आलु प्याज भण्डारं प्याज प्रति किलो ६० तकां मियाच्वंगु खःसा उगु हे कम्पाउण्डय् च्वंगु सुनापति आलु प्याज सप्लायर्सं प्रति किलो १२० मियाच्वंगु पत्ता लगे याःगु खः । सलेज भण्डारया थुवालं प्रति किलो ४५ तकां न्याःगु प्याज मािमउसे तयातःगु खः । छन्हु न्ह्यः तक १४० तकां मिया वयाच्वंगु सलेजं महानगरया अनुगमन समितिं बिल माग यायेवं छक्वलं भाः क्वकयाः ६० तकां मिउगु खः ।

सलेज भण्डारय् प्याजया भाः कुहां वःगु सीवं उपभोक्ताया हुल जूगु जक मखसे छक्वलं प्याज नं सिधःगु खः । थ्व खनाः बजाः वयाच्वंपिंसं नं म्हिगःतक १४० तकां मियाच्वंगु प्याज थौं ६० तकां मिउगु स्वये खन धकाः तकं धाःगु खः ।

थुपिं निगू पसलय् बाहेकं बजाःया मेमेगु पसलय् नं फरक फरक हे भावं प्याज मियाच्वंगु समितिं जानकारी बिउगु दु। बजारय् च्वंगु जेनिसा प्याज भण्डारं थम्हं होलसेल मू १०५ तका पुलागु जानकारी समितियात बिउगु खःसा युपि आलु प्याज भण्डारया संचालकं खुद्रा मूल्य ११५ तकां मियाच्वंगु खः। गुलिसिनं भाः हे मसिउगु तकं धाःगु खः ।

थुकथं छगू हे थासय् छगू हे कम्पाउण्ड दुने च्वंगु पसलय् फरक फरक भावं प्याज मियाच्वंगु लुइवं अनुगमन समितिं होलसेल व्यापारीयात आवश्वक भ्वंसहित कृषि विभागय् सम्पर्क याये निर्देशन बिउगु खँ सीदुगु दु ।

बरामद याःगु प्याज खाद्य कम्पनीं मीगु
येँ (रासस) – वाणिज्य, आपूर्ति व उपभोक्ता हित सरंक्षण विभागं बजाः अनुगमनया झ्वलय् बरामद याःगु प्याज खाद्य व्यवस्था तथा व्यापार कम्पनी लिमिटेडपाखें विक्री वितरण याइगु जूगु दु ।

थ्व हे वंगु असोज १ गते विभागया बजाः अनुगमन पुचलं बल्खु व कालिमाति तरकारि बजारय् सुचुकातःगु करिब १२०० किलो प्याज बरामद याःगु खः। उगु प्याज खाद्य कम्पनीं विक्री यायेत्यंगु खः । स्वनिगःया तरकारि बजारय् प्याजया कालोबजारी जुइवं बजाः अनुगमन याःगु इलय् सुचुकातःगु लुइवं प्रहरी प्रशासनया ग्वाहालिइ प्याज बरामद यानाः पसःया संचालकयात नियन्त्रणय् काःगु खः ।

बरामद याःगु प्याज तःन्हु तक तयातयेबलय् ध्वगिना वनीगु सम्भावना आपालं दुगुलिं मंगलवाः उद्योग मन्त्रालयय् जूगु सहलह लिपा खाद्य कम्पनीयात मीगु जिम्मा बीगु निर्णय याःगु खः। मन्त्रालयया निर्णयकथं विभागं प्याज मीगु जिम्मा कम्पनीयात बिउगु खः । व्यापारीं ५२ तका प्रतिकिलोया दरं न्याःगु प्याज व हे भावं कम्पनीयात मीगु निंतिं जिम्मा बियागु विभागया सूचना अधिकारी रविन्द्र आचार्यं कनादिल ।

सम्बन्धित बुखँ

LEAVE YOUR COMMENTS