ने. सं. ११४३ तछलाथ्व त्रयोदशी -

ऊर्जा लगानी यायेत युनानया गर्भनरयात इनाप

येँ – ऊर्जा, जलस्रोत व सिँचाइमन्त्री वर्षमान पुनं नेपाःया ऊर्जा क्षेत्रया विकासया निंतिं चीन सरकारया ग्वाहालि महत्वपूर्ण जुइगु खँ धयादीगु दु । चीनया युनान प्रान्तया गभर्नर रुएन चेङगफालिसे सोमवाः भेटवार्ता यासें मन्त्री पुनं थ्व खँ धयादीगु खः । सिंहदरवारय् च्वंगु ऊर्जा मन्त्रालयय् जूगु खँल्हाबल्हाया झ्वलय् द्विपक्षीय हितया लिसें ऊर्जा क्षेत्रय् लगानी यायेगु बारेसहलह जूगु खँ मन्त्री पुनया सचिवालयं धाःगु दु ।

मन्त्री पुनं चिनियाँ राष्ट्रपति सी चिनफिङया नेपाः भ्रमणपाखें निगू देय् दथुइ स्वापू क्वातुगु खँ न्ह्यथँसें उच्चस्तरीय भ्रमणं जनस्तरय् नं स्वापू क्वातुया वनीगु विश्वास प्वंकादिल ।नेपाल व चीन दथुइ ताःई न्ह्यवनिसें राजनीतिक, प्रशासनिक व जनस्तरया सम्बन्ध दु । थज्याःगु कथंया उच्चस्तरीय भ्रमणं चिनियाँ नागरिकयात नेपाः भ्रमणया निंतिं प्रोत्साहन जुइगु विश्वास दुगु खँ मन्त्री पुनं धयादीगु खः ।

नेपाः भ्रमणया झ्वलय् आइतवाः येँय् झायादीम्ह गभर्नर चेङगफाया नेतृत्वय् च्याम्ह दुजः दुगु प्रतिनिधि मण्डलं ऊर्जा मन्त्रीपुन लिसें मन्त्रालयया अधिकारीत लिसे सहलह याःगु खः । सहलहय् ऊर्जा क्षेत्रय् लगानी, पर्यटन व कृषि क्षेत्रय् सहकार्य यायेगु बारे सहलह जूगु खः । मन्त्री पुनं तामाकोशी तेस्रो जलविद्युत आयोजनाय् युनानया प्रान्ती सरकारं हे लगानी याइगु खबर थःपिंत वःगु धासें मेमेगु जलविद्युत परियोजनाय् नं लगानी यायेत इनाप यानादीगु खः ।

‘तामाकोशी तेस्रो जलविद्युत परियोजनाय् युनान सरकारया ८० प्रतिशत लगानी दुगु जानकारी चूलात । उकिया निंतिं सुभाय् दु । लिपांगु इलय् चीन लिसें विश्वया थीथी देय्या लगानीकर्तातय् ल्याः अप्वया वनाच्वंगु दु’ मन्त्री पुनं धयादिल । वय्कलं सरकारं जलविद्युतया क्षेत्रय् उदार नीति काःगु धासें नेपाःया जलविद्युतय् थपलगानीया निंतिं पहल यानाबीत नं इनाप यानादीगु खः ।

मन्त्री पुनं धयादिल, ‘जिमिसं जलविद्युत क्षेत्रय् अःपुगु नीति ज्वनागु दु । न्हापांगु झिदँय् आयकर तकं छुट बीगु प्रावधान दु । नेपाः दुने खपटया निंतिं बजाःया विस्तार जुया वनाचवंगु दु । भारत, कोरिया, चीन थेंज्याःगु देशपाखें लगानीकर्ता वयाच्वंगु दु । जिमिसं युनानपाखें नं थप लगानी जुइ धयागु आशा यानागु दु ।’

बंगलादेश व भारतय् मत मीगु निंतिं लुखा चाःगु खँ न्ह्यथँसें वय्कलं नेपालय् नं बजार निर्माण जुयाच्वंगु खँ धयादीगु खः । वय्कलं प्यदँ दुने ५ हजार मेगावाट मत उत्पादन जुइगु जानकारी बिसें नेपाल जलविद्युतया क्षेत्रय् आमूल प्रगति जुयाच्वंगु खँ धयादिल । मन्त्री पुनं सरकारं २०२० यात भ्रमण दँ न्यायेकगु निर्णय याःगु खँ न्ह्यथँसें युनान प्रान्तया जनतायात नेपाः भ्रमणय् वनेगु सन्देश बीत नं इनाप यानादीगु खः ।

युनान प्रान्तया गभर्नर चेङगफां थः नं चिनियाँ राष्ट्रपतिया भ्रमण लिपा नेपाः भ्रमण वयागु धासें युनान प्रान्तया सरकार नेपालय् कृषि, ऊर्जा, प्रविधि व पर्यटन क्षेत्रय् सहकार्य यायेत इच्छुक दुगु खँ धयादिल । गभर्नर चेङगफां तामाकोशी तेस्रो जलविद्युत आयोजनाय् युनान सरकारं लगानी याःगु धासें थ्व लगानी शुरुवात जक जूगु व वइगु इलय् युनानं जलविद्युत क्षेत्रय् थप लगानी हइगु बिचाः तयादिल ।

वय्कलं चिनियाँ राष्ट्रपतिया नेपाः भ्रमणया इलय् येँ–केरुङ रेलवे परियोजनाया अध्ययन यायेगु समझदारी जूगु खँ लुमंकादिसें रेलवे प रियोजना निर्माण लिसें युनान प्रान्त व नेपाःया व्यापारय् वृद्धि जुइगुविश्वास प्वंकादिल । युनान प्रान्तया गभर्नरं कुनमिङय् जुइगु ‘कुनमिङ साउथ एशिया एक्स्पो’य् सहभागी जुइत मन्त्री पुनःयात निमन्त्रणा नं बियादीगु खः ।