श्रमिकतय्त याकेफइगु ज्याया धलः दयेकीगु

येँ – श्रम रोजगार तथा सामाजिक सुरक्षा मन्त्रालयं श्रमिक आपूर्तिकर्तामार्फत श्रमिकयात ज्याय् लगे यायेगु सम्बन्धी ज्याया धलः तयार यायेत कार्यदल गठन याःगु दु । केन्द्रीय श्रम सल्हाकार परिषद्या शुक्रवाः च्वंगु बैठकं मन्त्रालयया सहसचिव रामप्रसाद घिमिरेया संयोजकत्वय् न्याम्ह दुजः दुगु कार्यदल गठन याःगु खः ।

कार्यदलया दुजलय् नेपाल उद्योग वाणिज्य महासंघया प्रतिनिधि चन्दप्रसाद ढकाल, नेपाल श्रमिक आपूर्तिकर्ता संघया प्रतिनिधि रामेश्वर शाह, संयुक्त टे«ड युनियन समन्वय केन्द्रया प्रतिनिधि विश्वनाथ प्याकुरेल व विज्ञया रुपय् अधिवक्ता रमेश बडाल दुथ्याःगु दु । थ्व कार्यदलं न्हय्न्हुया दुने प्रतिवेदन लःल्हायेमाः ।

बैठकं कार्यदलं सिफारिश याःगु आधारय् श्रमिक आपूर्तिकर्ता मार्फत श्रमिकयात ज्या याकेफइगु ज्याया धलः राजपत्रय् प्रकाशन यायेगु नं क्वःछिउगु दु ।अथेहे बैठकं श्रम ऐन २०७४ तथा योगदानय् आधारित सामाजिक सुरक्षा ऐन २०७४, ट्रेड युनियन ऐन २०४९ व बोनस ऐन २०३० लगायत ऐनय् दुगु प्रावधान दथुइ बाझे जुयाच्वंगु बुँदायात मिले यायते ऐन संशोधन यायेत सरकारयात सिफारिस यायेगु नं क्वःछिउगु दु ।

बैठकं थ्वहे साउन निसें लागू जूगु न्यूनतम पारिश्रमिकया सुनिश्तिताया निंतिं पारिश्रमिक तथा वित्तीय सुविधा चरणबद्ध अनिवार्य रुपं बैंक खाताय् भुक्तानी यायेगु व्यवस्था व बाल श्रम निवारण राष्ट्रिय गुरुयोजना सम्बन्धय् मन्त्रालयय् जूगु कार्य प्रगतिबारे नं सहलह जूगु खः ।