
येँ(नेपालभाषा टाइम्स)÷येँया क्वःने लागाया क्वहितिइ न्ह्यानाच्वंगु छवाःयंकंया धर्मदेशना ज्याझ्वः क्वचाःगु दु । न्हापांगु पलाः (नेवाः मिसा पुचः) या ग्वसालय् ज्याथःजिथिपिंत लक्षित यानाः वंगु भदौ १ निसें उगु धर्मदेशना ज्याझ्वः जुयाच्वंगु खः । धर्मदेशनाया लिपांगु दिं कुमार व कन्या पुजा नं याःगु खः ।
वंगु भदौ ८ गते सत्व पुजा यासें धर्मदेशना क्वचायेकूगु खः । धर्मदेशना क्वचाःगु लसताय् बौद्ध विद्वान प्रा.डा. नरेशमान बज्राचार्यया नेतृत्वय् राजगुरुजु मञ्जुश्रीरत्न वज्राचार्य, गुरुजुपिं दशरत्न वज्राचार्य, भीमरत्न वज्राचार्य, त्रिरत्न वज्राचार्य, शान्तश्रीरत्न वज्राचार्य व प्रविण वज्राचार्य गुरुमांपिं रविता वज्राचार्य, जेनिया वज्राचार्यं पुजा यानादीगु खः ।
न्हापांगु पलाःया नायः शिला साय्मिया विशेष सक्रियताय् बहाः बही, विहारय् वने मफुपिं ज्याथःजिथिपिनिगु निंतिं उगु धर्मदेशना ज्याझ्वः जूगु खः । छवाःयंकंया धर्मदेशना क्वचाःगु लसताय् सकसितं प्रसाद ग्रहण नं याकूगु खः ।
लुमंबकेबहजू न्हापा न्हापा पं. बद्रीरत्न वज्राचार्य (बद्री गुरुजु), पं. दिव्यरत्न वज्राचार्य लगायतया बौद्ध विद्वानपिंसं त्वाः त्वालय् थुकथं गुंलाया इलय् धर्मदेशना बीगु व जातक बाखनय् आधारित बाखं कनेगु याना वयाच्वनादीगु खः । थौंकन्हय् धाःसा थुकथं त्वाः त्वालय् बाखं कनेगु लोप जुइधुंकूगु दु ।
LEAVE YOUR COMMENTS