छत्रपाटी चिकित्सालयया बजेट खुगू करोड
येँ – छत्रपाटी निःशुल्क चिकित्सालयया चालु आर्थिक दँया बजेट ६ करोड ३७ लाख ७० हजार तका विनियोजन याःगु दु । चिकित्सालयया शनिवाः जूगु साधारण सभां आर्थिक दँ २०७५÷७६ या निंतिं थ्व बजेट पारित याःगु खः । चिकित्सालयया अध्यक्ष विजय बहादुर मालीया सभापतित्वय् जूगु साधारण सभाय् कोषाध्यक्ष दिनकरमान सिंह प्रधानं चालु आर्थिक दँय् आम्दानी ६ करोड १६ लाख ८५ हजार जुइगु व संचालन व पूँजीगत खर्च यानाः मुक्कं ६ करोड ३७ लाख ७० हजार जुइगु बजेट न्ह्यब्वयादीगु खः ।
सभाय् कोषाध्यक्ष प्रधानं वंगु आर्थिक दँ २०७४÷७५ य् कूल आम्दानी ६ करोड ३२ लाख, ९६ हजार ७१३ तका जूगु व कूल खर्च ५ करोड ६८ लाख ११ हजार २०७ तका जूगु प्रतिवेदन नं न्ह्यब्वयादीगु खः । सभां कोषाध्यक्ष प्रधानं न्ह्यब्वयादीगु आर्थिक प्रतिवेदन व लेखा परीक्षण प्रतिवेदन लिसें महासचिव जलकृष्ण श्रेष्ठं न्ह्यब्वयादीगु वार्षिक प्रतिवेदन नं पारित याःगु खः ।
चिकित्सालं वंगु आर्थिक दँय् १ लाख १ हजार ४७५ म्हेसित चिकित्सा सेवा प्रदान याःगु खः, गुकी २२२० म्हेसित चिकित्सालयय् उपलब्ध दुगु सेवाय् ३ लाख ८४ हजार १८७ तका बराबरया विशेष छुट बिउगु खः व ५ लाख ५ हजार ५६ तका बराबरया निःशुल्क वासः इनेज्या याःगु खँ धाःगु दु । सभाय् उपाध्यक्ष विद्या वनमाली प्रधानं लसकुस यानादीगु खः ।
LEAVE YOUR COMMENTS