लिभरपुल विजयलिसें लिगया शीर्ष स्थानय्
अन्तिम इलय् निगू गोल यासें लिभरपुलं एस्टन भिल्लायात २–१ गोलं बुकूगु दु । थ्व विजय लिसें लिभरपुल प्रिमियरशीप लिगय् ६ अंकया अग्रता कायम यासें शीर्षस्थानय् हे च्वनाच्वनेत ताःलाःगु दु । म्हिगः बहनी जूगु कासाय् भिल्लां लिभरपुलया झिला न्ह्यवनिसेंया अपराजित यात्रायात पूर्णविराम बीत्यंगु खः ।
कासाया २१ औं मिनेटय् ट्रेजग्युएट्सं जोन म्याक्गिनया फ्रिकिकय् भलि थ्वासें गोल यानाः भिल्लायात अग्रता बिउगु खः । तर भिल्लां कासा क्वचायेत ३ मिनेट ल्यं दनिबलय् थःगु अग्रता बचे यायेमफुत । कासाया ८७ औं मिनेटय् एण्डी रोबर्टसन् हेड यासें लिभरपुलया निंतिं बराबरीया गोल यानाबिल ।
थ्व लिपा न्यागू मिनेट थप याःगुलिइ ९४ औं मिनेटय् साडियो मानें ट्रेन्ड अलेक्जेन्डरया कर्नर किकयात ब्याक् हेडपाखें गोल यानाः लिभरपुलयात विजय चूलाकाबिउगु खः । थ्व विजय लिपा निगूगु थासय् लानाच्वंगु म्यानचेस्टर सिटी स्वयां लिभरपुलं ६ अंकया स्पष्ट अग्रता काःगु दु ।
सिटी नं म्हिगः हे जूगु कासाय् साउथम्पटनयात २–१ गोलं बुकूगु खः । सिटी वइगु आइतवाः लिभरपुलया घरेलु मैदानय् म्हितः वनेत्यंगु खः । सिटी नं घौछि धयाथें छगू गोलं लिउने लानाच्वंगु खः । कासाया १३ औं मिनेटय् साउथम्पटनया वार्ड प्रोवेसें याःगु गोलया कारणं छगू गोलं लिउने लानाच्वंगु सिटीं कासाया ७० औं मिनेटय् तिनि सर्जियो अग्वेरोया गोलया कारण कासा बराबरी यायेत ताःलाःगु खः ।
थ्वयां १६ मिनेट लिपा केले वाल्करं याःगु गोलं सिटीं विजय चूलाकूगु खः । कासा लिपा न्ववासें सिटीया प्रशिक्षक पेप ग्वार्डिओलां धाःगु दु, ‘साउथम्पटनया झिंछम्हं कासामितय्सं १८ यार्डया बक्सय् च्वनाः डिफेन्डर यानाच्वबलय् आक्रमण यायेगु निंतिं थाय् हे मंत ।’ ‘जिपिं तसकं धैर्यपूर्वक म्हिता, गोल यायेगु कुतः हे यानाच्वना । लगातार आक्रमणया कारणं गोल यायेत ताःलात’ ग्वार्डिओलां
धाःगु दु ।
LEAVE YOUR COMMENTS