बार्सिलोना, बार्यन, युभेन्ट्स, युनाइटेड व चेल्सी त्यात

एजेन्सी- युइएफए च्याम्पियन्स लिग अन्तर्गत बुधवाः चान्हय् जूगु समूह इ या कासाय् बार्सिलोनां युक्रेनी क्लब डायनामो किभयात बुकूगु दु । च्याम्पियन्स लिगय् बार्साया थ्व न्हापांगु विजय खः । झ्वलाक्क निगू कासा बूगु बार्सिलोनां डायनामो किभयात १–० गोलं बुकूगु खः । बार्सिलोनाया निंतिं जेरार्ड पिकें गोल याःगु खः । थ्व हे पुचलय् च्वंगु जर्मन क्लब बार्यन म्युनिखं पोर्चुगिज क्लब बेन्फिकायात ४–० गोलं बुकल । बार्यनया निंतिं लोरी सानें निगू व रोर्बट लेवान्डोस्कीं छगू गोल याःगु खः । मेगु छगू गोल आत्मघाती जूगु खः ।

बेन्फिकाया सोरेसं आत्मघाती गोल याःगु खः । लिगया स्वंगुलिं कासा त्याकाः बार्यन शीर्ष थासय् दु । बार्यननाप बूगु बेन्फिका निगूगु व बार्सिलोना स्वंगूगु थासय् दु ।

लिग अन्तर्गत जूगु समूह एफया कासाय् म्यानचेस्टर युनाइटेडं एटलान्टायात बुकूगु दु । निगू गोलं लिउने लानाच्वंगु युनाइटेडं एटलान्टायात ३–२ गोलं बुकूगु खः । एटलान्टाया निंतिं मारियो पासालिस व मेरिह डिमिरलं गोल यासें युनाइटेडविरुद्ध न्हापांगु हाफय् हे निगू गोलया अग्रता बिउगु खः तर निगूगु हाफय् युनाइटेडया मार्कुस रासफोर्ड, ह्यारी मागुरी व क्रिष्टियानो रोनाल्डों छगू छगू गोल यानाबिल ।

पुचःया मेगु कासाय् भिल्लारियलं योङ ब्वाइजयात ४–१ गोलं बुकूगु दु । भिल्लारियलया जेरार्ड मोरेनाें निगू गोल याःगु खःसा येरेमी पिनो व सामुएलं छगू छगू गोल यात । थ्व पुचलय् युनाइटेड शीर्ष थासय् दु ।

अथे हे समूह ‘जी’या कासाय् आरबी साल्बर्गं वुल्फवर्गयात ३–१ गोलं बुकूगु दु । थ्व हे पुचलय् च्वंगु सेभिल्ला व लिलें गोलरहित बराबरी म्हितल । साल्बर्गंं पुचःया शीर्ष थासय् दु ।

समूह ‘एच’या कासाय् युभेन्ट्स व चेल्सी त्याःगु दु । युभेन्ट्सं जेनिथ सेन्ट पिटर्सवर्गयात १–० गोलं बुकूगु खः । युभेन्ट्सया निंतिं डिजान कुलुसेभस्की गोल याःगु खः । अथे हे मेगु कासाय् चेल्सीं माल्मोयात ४–० गोलं बुकल । चेल्सीया निंतिं जर्गिन्हाें निगू गोल पेनाल्टीइ याःगु खःसा एन्ड्रियास क्रिस्टिन्सेन व काइ हभार्टजं छगू छगू गोल याःगु खः । कासाय् चेल्सीया निम्ह मुख्य कासामि रोमेलु लुकालु व टिमो वार्नर धाःसा घाःपाः जुल । थ्व पुचःया शीर्ष थासय् युभेन्ट्स व निगूगु थासय् चेल्सी दु ।