प्यक्वःखुसी नाडालयात युएस ओपन उपाधी

स्पेनिस कासामि राफेड नाडालं थुगुसीया युएस ओपन त्याकूगु दु । नाडालया थ्व प्यक्वःगु युएस ओपन उपाधी खःसा झिंगूगुं ग्रान्डस्लाम उपाधी खः । थ्वयां न्ह्यव नाडालं सन् २०१०, २०१३ व २०१७ य् युएस ओपन त्याकूगु खः । आइतवाः जूगु फाइनल कासा रसियन कासामि डानिल मेडभेडेभ विरुद्ध कठीन विजय चूलाकुसें नाडालं उपाधी ल्हातय् लाकूगु खः ।

नाडालं मेडभेडेभयात ७–५, ६–३, ५–७, ४–६ व ६–४या न्यागू सेटं कासा ल्हातय् लाकूगु खः । नाडालं न्हापांगु निगू सेट त्याकूगु खःसां स्वंगूगु सेटय् थःगु विजय लय कायम याना तयेमफुत । अथे जूबलय् थ्व फाइनल प्यघौ व ५० मिनेट ताःहाकः जूवंगु खः । थ्व फाइनल कासा युएस ओपनयु जूगु आःतकया दकलय् ताःहाकःगु फाइनल कासा स्वयां ४ मिनेट जक म्हो जूगु खः ।

नाडालया थ्व उपाधी दकलय् अप्वः ग्रान्डस्लाम त्याकातःम्ह स्वीस प्रतिद्वन्द्वी रोजर फेडररया स्वयां छगूलिं जक म्हो खः । ‘थ्व जिगु टेनिस जीवनया हे दकलय् भावुक क्षण जूगु दु’ कासा त्यायेधुंकाः नाडालं धाःगु दु, ‘थ्व तसकं रोमाञ्चक फाइनल जुल ।’

सम्बन्धित बुखँ

LEAVE YOUR COMMENTS