मनाङ, थ्रीस्टार व च्यासल त्यात

येँ – शहीद स्मारक लिग अन्तर्गत बुधवाः जूगु कासाय् मनाङ मस्र्याङ्दी, थ्रीस्टार व च्यासल क्लब त्याःगु दु । थ्व विजय लिपा मनाङ शीर्षस्थानय् हे दुसा थ्रीस्टार निगूगु थासय् थहां वःगु दु । मनाङं जावलाखेल युथ क्लबयात बुकूगु दु । झ्वलाक खुगू कासा त्याकेगु झ्वलय् मनाङ जावलाखेलयात १–० गोलं बुकूगु खः।

एन्फा कम्प्लेक्स जूगु कासाय् लिगया शीर्ष थासय् लानाच्वंगु मनाङयात कमजोर नालातःगु जावलाखेलयात बुकेत धाःसा तसकं थाकुल । न्हापांगु हाफ गोलरहित बराबरीइ क्वचागु खःस निगूगु हाफया ६२ औ मिनेटय् जक पेनाल्टीया ग्वाहालिं मनाङं विजय गोल चूलाकेफुगु खः । पेनाल्टिइ अञ्जन विष्टं गोल याःगु खः ।

अफिज ओलवाअ‍ेयात डिबक्सय् फल तयेवं मनाङयात पेनाल्टी चूलाःगु खः। मेखे थ्रीस्टारं सरस्वती युवा क्लबयात २–१ गोलं बुकल । छगू गोलं लिउने लायेधुंकूगु थ्रीस्टारं निगू गोल यानाः विजय चूलाकूगु खः । थ्रीस्टारया निंतिं निराजन खड्का व रञ्जित धिमालं छगू छगू गोल यात ।

कासाया स्वंगूगु मिनेटय् हे सरस्वतीं पेनाल्टि पाखें गोल यासें कासाय् अग्रता काःगु खः । सरस्वतीया कासामि फ्रान्सिस ओनेमां थ्वाःगु बल डिबक्स दुने पिटर सगुनया ल्हातय् लायेवं सरस्वतीयात पेनाल्टिया ह्वःताः वःगु खः । थुकी भिक्टर अमोबीं पेनाल्टि थ्वानाः गोल यासें अग्रता बिउगु खः ।

कासाया १६ औ मिनेट थ्रीस्टारयात नं पेनाल्टिया ह्वःताः चूलात । सरस्वतीयात पेनाल्टिया ह्वःताः वः थें हे थ्रीस्टारया अनिल गुरुङं थ्वाःगु बल सरस्वतीया डिफेन्डरया ल्हातय् लायेवं पेनाल्टि बिउगु खः । थुकी रञ्जित धिमालं गोल यासें कासा बराबरीइ हःगु खः । कासाया ३५ औं मिनेटय् रञ्जन विस्टं बिउगु पासय् निराजन खड्कां हेडपाखें गोल याःगु खः ।

थ्व हे गोल थ्रीस्टारया निंतिं विजयी गोल जुल । च्यासल क्लबं नं हिमालयन शेर्पायात २–१ गोलं हे बुकल । न्हापांगु हाफय् छगू गोलं लिउने लायेधुंकूगु च्यासलं निगूगु हाफय् निगू गोल यासें कासा त्याकूगु खः । कासाया १५ औं मिनेटय् हिमालयन शेर्पाया त्रिदेव गुरुङं गोल यासें अग्रता काःगु खः ।

च्यासलया निंतिं ५६ औं मिनेटय् सन्तोष साहुखलः नं न्हापांगु गोल याःगु खःसा ७३ औं मिनेटय् वैकल्पिक कासामि सुनिल खड्कां गोल याःगु खः ।