दकलय् अप्वः गोल याःगु दे जुसें ब्राजिल क्वाटर्रफाइनलय्

एजेन्सी- मेक्सिकोयात २–० गोलं बुकाः ब्राजिल विश्वकप २०१८ या क्वार्टरफाइनलय् दुहां वनेत ताःलाःगु दु । नकतिनि क्वचाःगु कासाय् ब्राजिलया निंतिं नेयमारं छगू व रोबर्टो फेर्मिनों छगू गोल याःगु खः ।

न्हापांगु हाफ बराबरीइ क्वचाःसां निगूगु हाफ सुरु जूगु खुगू मिनेटय् हे नेयमारं गोल यासें ब्राजिलयात अग्रता बिउगु खःसा फेर्मिनोया गोलया निंतिं नं नेयमारं बांलाःगु पास चूलाकाबिउगु खः । ब्राजिल विश्वकपय् झ्वःलाक्क क्वार्टरफाइनलय् थ्यंगु थ्व न्हय्क्वःगुखुसी खः ।
कासा सुरु जुइगु न्हापांगु १५ मिनेट मेक्सिकों ब्राजिलयात दबाबय् लाःगु खः, तर न्याक्वःतकया विश्वकप विजेता ब्राजिलं बुलुहुं कासाय् थःगु पकड कायम यानाहःगु खः ।

नेयमारं याःगु गोल ब्राजिलं विश्वकपय् याःगु २२७ औं गोल खः । थ्व गोल लिसें ब्राजिल विश्वकपय् दकलय् अप्वः गोल याःगु देय् जूगु दु । थ्वयां न्ह्यः विश्वकपय् दकलय् अप्वः गोल याःगु देय् जर्मनी जुयाच्वंगु खः ।