निगू मंकाः खलः गथे खनेदत ?
नेपालभाषा ख्यलय् थीथी संस्थाय् दुने व पिने विवाद जुइगु धइगु गुगुं न्हूगु खँ मखु । नेवाःतय् राष्ट्रिय संगठन कथं दयाच्वंगु नेवाः देय् दबूया विवाद ताःई तक न्ह्यानाः अन्ततः दाङ्गया अधिवेशनं छगू नेतृत्व ल्ययाः क्वचाःगु खनेदत । तर आः नं असहमत पक्ष ल्यनाच्वंगु खँ थीथी अनौपचारिक ख्यलय् वर्तमान नेतृत्वप्रतिया अविश्वासया अभिव्यक्तिपाखें खनेदयाच्वंगु हे दु ।
मेखे नेवाःतय्गु राजनीतिक प्रतिनिधिकथं स्थापित जुइगु धकाः घोषणा याःगु नेपाः राष्ट्रिय पार्टीया पुलांगु नेतृत्वया मनूत हे उखेथुखे वनाबिल । लिपांगु संविधानसभाय् दुम्ह सभासद् भाजुं थःगु पद बचे यायेत मेगु हे पार्टी चायेकूगु नं खनेदत । तर आः वयाः नेपालभाषा मंकाः खलःया धकाः छगू हे नामं छगू हे लोगो छ्यलाः निथी मनूत सना जूगु खनाः नेवाःत अजूगति चाःगु दु ।
छगू इलय् भाषा व नेपाल संवत् आन्दोलनयात न्ह्यःने यंकाः सकल नेवाःतय्गु आस्थाया केन्द्र जुइधुंकूगु नेपालभाषा मंकाः खलः हे निगू दुगु धकाः विवाद पिदनाच्वंगु दु । थ्व विवाद भाषा ख्यलय् जक खँ जुइगु जुयाच्वंगुलिइ नेपालभाषा मंकाः खलःया नायः दुर्गालाल श्रेष्ठं सार्वजनिक वक्तव्य हे जारी यासेंलि आः थ्व विवाद सार्वजनिक रूपय् सकसिनं खंकूगु दु ।
खतुं गुगुं इलय् दयाच्वंगु नेपालभाषा मंकाः खलःया मूछ्याञ्जे नरेशवीर शाक्य नं खः । अधिवेशन जुयाः मेगु नेतृत्व मवःतले थःहे मूछ्याञ्जे जुयाच्वनीगु व अधिवेशन बाहेक मेगु लँपुं नेपालभाषा मंकाः खलःया पुलांपिं पदाधिकारी थःथःपिं जानाः याइगु पुनर्गठन स्वीकार्य मजुइगु खँया अडान तयादीगु खँ न्यनेदु ।
थथे जुइबलय् मंकाः खलः दर्ता यानाः न्ह्याः वनेगु व थीथी कथंया गतिविधि यायेत लँपु मचाइगु खनाः पुलांपिं सहमत मजूपिं पदाधिकारी मुनाः समिति पुनर्गठन याःगु व उकियात येँया जिल्ला प्रशासन कार्यालयय् दर्ता याःगु खँ सीदुगु दु । थुकथं नेपालभाषा मंकाः खलःया नायः आः पुलांम्ह न्वकु जनकवि दुर्गालाल श्रेष्ठ जुयादीगु दु ।
थुगु मंकाः खलकं येँ महानगरपालिकाया ५ गू करोड तका ग्वाहालिं मंकाः दबूछेँ दनेगु ताः तयाः न्ह्यानाच्वंगु खँ नं सीदुगु दु । थुकिया निंतिं मंकाः खलःया जग्गाय् कानुनतः जग्गा थुवाःया नां दुपिं पद्मरत्न तुलाधर व काजीलाल श्रेष्ठया सन्तानपिंसं नं मंकाः खलःया नामय् हे जग्गा नामसारी दर्ता यानाबीत राजी जुइधुंकूगु दु धइगु खँ पिहां वःगु दु ।
यदि सुनां नं प्रचलित संस्था दर्ता कानुनयात हाचां गायाः नेपालभाषा मंकाः खलःया आधिकारिक दर्ता जुयाच्वंपिं पदाधिकारी मखयेक थःत छ्याञ्जे वा मेता छुं पदाधिकारी धकाः न्ह्यथनाः नेपालभाषा मंकाः खलःया लेटरप्याड छ्यलाः गुगु नं गतिविधि यायेगु अनधिकृत ज्या खः नापं कानुनतः दण्डनीय खः ।
मंकाः खलः थुकथं न्ह्याःगु बांलाःगु हे खँ खः ।थुकिया हे दथुइ वंगु असोज ६ गते सोमवाःकुन्हु नेपालभाषा मंकाः खलःया नामं नरेशवीर शाक्यं छगू ज्याझ्वः न्ह्याकादिल । पञ्चाङ्ग निर्णायक समितिया निर्णयकथंया तिथिमिति, नखःचखः तयाः पिहां वःगु पात्रोय् थुगुसीया स्वन्ति नखः गोलमाल यानातःगु खँयात कयाः जूगु सहलह अत्यावश्यकीय हे खः ।
थुकी शताब्दीपुरुष सत्यमोहन जोशी व पुलांम्ह सभासद् लक्ष्मण राजवंशीजुपिंसं नं पञ्चाङ्ग निर्णायक समितिं नेवाःतय्गु नखः चखःयात गोलमाल याःगु खँय् विरोध प्वंकादीगु खः । तर थुगु ज्याझ्वः नेपालभाषा मंकाः खलःया नां व लोगो छ्यलाः जुल । थ्व हे खँय् दर्ता जूगु नेपालभाषा मंकाः खलःया नायः भाजु दुर्गालाल श्रेष्ठं माल धाःसा कानुनी रूपं तकं न्ह्याः वनीगु धकाः वक्तव्य पिथनादिल ।
आः थुगु वक्तव्य छक्वः नं ब्वना स्वये– ‘नेपालभाषा मंकाः खलःया नामं सुं सुं मनुखं येँया छगू होटेलय् निम्ह प्यम्ह नेवाः बौद्धिक ख्यःया मनूत नापं संलग्न यासें नकतिनि गुगु ज्याझ्वःया ग्वसाः ग्वःगु समाचार वःगु दु, उकी नेपालभाषा मंकाः खलःया गम्भीर ध्यानाकर्षण जूगु जुल ।
नेपालभाषा मंकाः खलः थनिं पीछदँ न्ह्यः क्षेत्रपातिया चाकलाः दबू संस्थाया संयोजनय् येँ जिल्लाया थीथी भाषा, जाति, साहित्यिक, सांस्कृतिक पुचःतय्त छथासं तयाः मदुम्ह पद्मरत्न तुलाधरया अध्यक्षताय् नीस्वंगु खः । थुकिया न्वकू जनकवि दुर्गालाल श्रेष्ठ, छ्याञ्जे मल्ल के. सुन्दर, प्रचार छ्याञ्जे राजा शाक्य अले दांभरिं गणेश साय्मि, कमलप्रसाद जोशी व मदुम्ह काजीलाल श्रेष्ठपिं दुजः खः ।
उकियात निरन्तरता बीगु व न्हूकथं न्ह्याकेगु तातुनाः थ्व हे ने.सं ११३९ दिल्लाय् पुलांपिं संस्थापकपिं दुथ्याकाः जनकवि दुर्गालाल श्रेष्ठया नेतृत्वय् नेपालभाषा मंकाः खलः आधिकारिक रूपं येँ जिल्ला कार्यालयय् दर्ता यायेगु ज्या जूगु सकसिनं सिउगु हे जुल । आधिकारिक रूपं जिल्ला कार्यालयय्दर्ता जुयाः क्रियाशील जुयाच्वंगु नेपालभाषा मंकाः खलःया न्वकू मल्ल के.सुन्दर, छ्याञ्जे राजा शाक्य अले दांभरिं गणेश साय्मि खः ।
अथेहे किरण श्रेष्ठ, डा. चुन्दा वज्राचार्य, मंगला कारञ्जित, प्रविणलाल श्रेष्ठ व सुजन तुलाधरपिं थुकिया दुजःपिं खत । दुजः पुचलय् दुथ्याःपिं च्वय् न्ह्यथनापिं गुम्हसिकं अप्वः सुं नं आधिकारिक प्रतिनिधि मखु । यदि सुनां नं प्रचलित संस्था दर्ता कानुनयात हाचां गायाः नेपालभाषा मंकाः खलःया आधिकारिक दर्ता जुयाच्वंपिं पदाधिकारी मखयेक थःत छ्याञ्जे वा मेता छुं पदाधिकारी धकाः न्ह्यथनाः नेपालभाषा मंकाः खलःया लेटरप्याड छ्यलाः गुगु नं गतिविधि यायेगु अनधिकृत ज्या खः नापं कानुनतः दण्डनीय खः ।’
वक्तव्यय् नेवाःतय्गु दथुइ गुगुं कचवं दु धइथें च्वंक सार्वजनिक स्थिति मवयेमाः धकाः तच्वःगु लिच्वः मबीसे क्यनाच्वनागु सौहार्द्रतायात कमजोरी मतायेके धकाः धासें हानं नं थुकथं जुल धाःसा कानुनी लँपु लीगु खँया चेतावनी बियातःगु दु । नेपालभाषा मंकाः खलः वामपन्थी वर्चस्वया संगठन खः ।
खलः पुचः दुजः जुइगु थुगु संगठनय् व्यक्तिगत दुजः जुइगु व्यवस्था नं दयेकल तर व्यक्तिगत दुजः जूपिं पदाधिकारीइ वये मदु धासेंलि लोकतान्त्रिक खेमाया हितकरवीर सिंह कंसकारपिंसं सभागृहया हल हे त्वःताः अधिवेशन बहिष्कार याःगु खः । अबलेनिसें मंकाः खलःया अधिवेशन गुबलें मजुल ।
मंकाः खलःया अधिवेशन यायेमाल धइगु सः आपाःसिनं ल्ह्वंगु व थ्व खँय् मदुम्ह नायः पद्मरत्न तुलाधरया आलोचना नं जुया वयाच्वंगु खः । तर वय्कःया व्यक्तित्वया हुनिं सुं नं न्ह्यचिले मफुगु नं खः । नेपालय् भाषा जाति आन्दोलनया न्हापांगु अभियन्ता संगठन थुज्वःगु नेपालभाषा मंकाः खलःया नामय् गुगु विवाद पिदन व सुखद् खँ मखु ।
उकिं भाषा ख्यःया प्रबुद्धपिं जानाः थुकियात ज्यंकेमाः । कानुनकथं दर्ता याःवनेगु बैंक खातानिसें सकतां ज्याया निंतिं झीसं नजरअन्दाज यायेमफइगु खँ जुइगु तर थःथः ल्वानाः नं प्रशासनय् वनेमाःगु नौबत जुल धाःसा नेवाःतय्गु नितिं दुर्भाग्य जुइ ।
LEAVE YOUR COMMENTS